26 جنوری ، 2024 
گورنر نے خاتون ٹیچر سے ہراسانی پر برطرف ملازم کی سزا معافی کیلئے حکومت کو خط لکھ دیا
26 جنوری ، 2024
گورنر سندھ کامران ٹیسوری نے خاتون ٹیچر سے جنسی ہراسانی پر برطرف لاڑکانہ کے انٹرمیڈیٹ اینڈ سیکنڈری بورڈ کے چیئرمین نسیم میمن کی سزا معافی کیلئے سندھ حکومت کو خط لکھ دیا۔
گزشتہ دنوں صوبائی محتسب نے خاتون ٹیچر کو ہراساں کرنے کے الزام میں لاڑکانہ کے انٹرمیڈیٹ اینڈ سیکنڈری بورڈ کے چیئرمین نسیم میمن کو عہدے سے برطرف اور جرمانے کی سزا سنائی تھی۔
اب گورنر سندھ نے برطرف نسیم میمن کی سزا معاف کرنے کی درخواست کردی ہے۔ انہوں نے سزا معاف کرنے کیلئے سندھ حکومت کو خط لکھا ہے۔
صوبائی محتسب کے فیصلے پر نگران وزیر اعلیٰ نے نسیم میمن کو لاڑکانہ بورڈ سے برطرف کردیا تھا۔
دوسری جانب ترجمان گورنر کے مطابق نسیم میمن کے خلاف محتسب کی سزا پر گورنر سندھ کی جانب سے حتمی فیصلہ نہیں کیا گیا، ان کی جانب سےحتمی فیصلے تک معطلی کی سزا پرعملدرآمد روکا گیاہے۔
ترجمان نے بتایاکہ نسیم میمن کے معاملہ کا قانون کے مطابق جائزہ لیا جارہا ہے۔
ترجمان کے مطابق قانون کے تحت گورنر سندھ صوبائی محتسب کے فیصلوں کے خلاف ایپلیٹ اتھارٹی ہیں اور نسیم میمن نے اس قانون کے تحت گورنر کو فیصلے کے خلاف اپیل کی۔
