کاروبار

ایف بی آر نے پرچون فروشوں کو ٹیکس نیٹ میں لانے کی تیاری شروع کر دی

08 مارچ ، 2024

ایف بی آر کے ذرائع کے مطابق 55 لاکھ پرچون فروشوں کو ٹیکس نیٹ میں لایا جائے گا— فوٹو: فائل

لاہور: ذرائع کے مطابق فیڈرل بیورو آف ریونیو (ایف بی آر) نے ٹیکس نیٹ بڑھانے کی حتمی تیاری شروع کردی ہے جس کے تحت پرچون فروشوں کو بھی ٹیکس نیٹ میں لایا جائے گا۔

ایف بی آر کے ذرائع کے مطابق 55 لاکھ پرچون فروشوں کو ٹیکس نیٹ میں لایا جائے گا اور چھوٹے سے چھوٹا دکاندار بھی ٹیکس نیٹ میں شامل ہوگا۔

ذرائع کے مطابق محکمے کے پاس فہرستیں موجود ہیں اور ان کی اسکروٹنی بھی ہوچکی ہے، ٹیکس نیٹ میں آنے والے تمام دکاندار نئے مالی سال سے ٹیکس گوشوارے جمع کروانے کے پابند ہوں گے۔

یہ بھی پڑھیں

پرچون فروشوں کو کب ٹیکس نیٹ میں لایا جائیگا، آئی ایم ایف نے ایف بی آر سے ٹائم فریم مانگ لیا

ذرائع کا کہنا ہے کہ کچھ ایسے دکاندار بھی ہیں جن کی ماہانہ لاکھوں روپے کی سیل ہے، ان دکانداروں کا رہن سہن، گھر، گاڑی ٹیکس نیٹ میں شامل نہیں ہے، ٹیکس نیٹ میں نہ ہونے کی وجہ سے ہربار آئی ایم ایف کے آگے ہاتھ پھیلانے پڑتے ہیں۔

ذرائع کا کہنا ہے کہ جس طرح بجلی اور گیس چوری کےخلاف آپریشن ہوا، یہ آپریشن بھی اسی طرز کا ہونے جارہا ہے۔

خیال رہے کہ بین الاقوامی مالیاتی فنڈ (آئی ایم ایف) نے فیڈرل بورڈ آف ریونیو (ایف بی آر) سے استفسار کیا تھا کہ 30 لاکھ دکانداروں کو ٹیکس نیٹ میں لانے کے لیے پرچون فروشوں کی اسکیم کا نفاذ کب کیا جائے گا۔