14 اپریل ، 2024 
ایران اسرائیل کشیدگی، افغانستان اور ایران سے پاکستان آنیوالی پروازوں کی نگرانی کی ہدایت
14 اپریل ، 2024
پاکستان سول ایوی ایشن نے ایران اسرائیل کشیدگی کے پیش نظر افغانستان اور ایران سے پاکستان کی فضائی حدود میں آنے والی تمام پروازوں کی نگرانی کی ہدایت کی ہے۔
سول ایوی ایشن ذرائع کے مطابق پاکستان ائیر ٹریفک کنٹرول کو نئی ہدایت جاری کر دی گئی ہے جس میں انہیں پاکستان کی فضائی حدود میں آنے والی پروازوں کو ائیر ٹریفک کنٹرول کی اجازت لینا لازمی قرار دیا گیا ہے۔
یاد رہے دمشق میں ایرانی قونصل خانے پر حملے کا جواب دیتے ہوئے ایران نے ہفتے اور اتوار کی رات اسرائیل پر 200 سے زائد ڈرونز اور میزائلوں سے حملہ کیا، جس کے بعد مختلف ممالک نے اپنی فضائی حدود کو ٌپروازوں کیلئے بند کر دیا ہے۔
دوسری جانب پاکستان کی وزارت خارجہ نے ایران اسرائیل کشیدگی پر ردعمل کا اظہار کرتے ہوئے صورتحال پر گہری تشویش کا اظہار کیا ہے۔
ترجمان دفتر خارجہ کی جانب سے جاری بیان میں کہا گیا ہے کہ پاکستان کو مشرق وسطیٰ کی صورتحال پر گہری تشویش ہے، پاکستان صورتحال کا تشویش کیساتھ جائزہ لے رہا ہے۔
