قصور … قصور میں آزاد امیدوار ڈاکٹرعظیم الدین لکھوی این اے140کیووٹوں کی گنتی کے عمل کا بائیکاٹ کرکے باہرآگئے ہیں،ان کا کہنا ہے کہ وہ انصاف اورحقیقی نتائج کیلئے عدالت سمیت تمام فورمز پر جائیں گے،دوسری جانب تیسرا دن شروع ہونے کے باوجود الیکشن کمیشن نتائج کا اعلان کرنے میں خاموش ہے۔قومی اسمبلی کے حلقہ 140 قصور تھری میں ضمنی الیکشن میں بار بار تبدیلی اورغلط نتائج کی شکایات پر نتائج معطل کر دیے گئے، ڈسٹرکٹ الیکشن آفس میں249 پولنگ اسٹیشنوں میں ڈالے گئے ووٹوں کی فہرستوں کا جائزہ اور مسترد شدہ ووٹوں کی دوبارہ گنتی رات بھر جاری رہی،تاہم آدھی رات کے وقت32گھنٹے کے انتظار کے بعد آزاد امیدوار ڈاکٹر عظیم الدین لکھوی گنتی کے اس عمل سے الگ ہو گئے،انہوں نے کہا کہ حلقے میں تمام پڑنے والے ووٹوں کی گنتی کی درخواست دی ہے، لیکن ایسا نہیں کیا جا رہا،اور وہ انصاف اورحقیقی نتائج کیلئے عدالت سمیت تمام فورمز پر جائیں گے،واضح رہے کہ اس حلقے سے دو بار آزاد امیدوار ملک رشید خان اور ایک بار ڈاکٹر عظیم الدین لکھوی کے جیتنے کا اعلان کیا جا چکا ہے۔