25 اپریل ، 2024 
بلوچستان میں کوئلہ کانوں میں زہریلی گیس بھرنےکے دو واقعات میں 5کان کن جاں بحق
25 اپریل ، 2024
بلوچستان کے اضلاع ہرنائی اور دکی کی کوئلہ کانوں میں زہریلی گیس بھرنے کے دو مختلف واقعات میں 5کان کن جاں بحق ہوگئے۔
چیف مائنز انسپکٹر عبدالغنی نے بتایا کہ دکی کی مقامی کوئلہ کان میں زہریلی گیس بھر جانے سے 3 کان کن جاں بحق ہوئے۔
جاں بحق ہونے والے تینوں کان کنوں کا تعلق افغانستان سے ہے، تینوں کان کنوں کی لاشیں کان سے نکال کر اسپتال منتقل کردی گئی ہیں۔
زہریلی گیس بھرنے کا دوسرا حادثہ ہرنائی کے علا قے شاہرگ کی کوئلہ کان میں پیش آیا جہاں پی ایم ڈی سی ایریا کی کوئلہ کان میں زہریلی گیس بھرنے سے دم گھٹنے کے باعث 2 کان کن جاں بحق ہوگئے، جن کا تعلق پشین سے ہے۔
کان کنوں نے دونوں لاشوں کو اپنی مدد آپ کے تحت کان سے نکال کر اسپتال منتقل کر دیا جہاں سے ضروری کارروائی کے بعد لاشیں ورثاءکے حوالے کر دی گئیں۔
