08 مئی ، 2024 
وزیر اعلیٰ مریم نواز کی آئی جی پنجاب کو وکلاء کیخلاف طاقت کا استعمال نا کرنیکی ہدایت
08 مئی ، 2024
وزیر اعلیٰ پنجاب مریم نواز نے آئی جی پنجاب ڈاکٹر عثمان انور کو ہدایت کی ہے کہ لاہور میں احتجاجی وکلا کے خلاف طاقت کا استعمال نہ کیا جائے۔
سوشل میڈیا ایپ ایکس پر جاری بیان میں مریم نواز نے کہا کہ انہوں نے آئی جی پنجاب پولیس کو وکلاء کےخلاف طاقت کےاستعمال سے گریز کرنے کی ہدایت کی ہے۔
وزیر اعلیٰ پنجاب مریم نواز نے کہا کہ وکلاء بھی لاہور ہائیکورٹ سے معاملات خوش اسلوبی سےحل کریں،تاکہ لاہور کے شہریوں کے تحفظ کے لیے محاذ آرائی سے گریز کیا جائے۔
خیال رہے کہ سول عدالتوں کی منتقلی اور وکلا پر دہشتگری کے مقدمات کے خلاف وکلا لاہور میں آج صبح سے ہی احتجاج کر رہے ہیں جس پر پولیس کی جانب سے احتجاج کرنے والے وکلا پر لاٹھی چارج اور شیلنگ کی گئی اور درجنوں وکلا کو گرفتار بھی کیا گیا جس کے بعد پاکستان بار کونسل نے پولیس تشدد کے خلاف کل ہڑتال کی کال بھی دے دی۔
