جوہانسبرگ…پہلے کرکٹ ٹیسٹ میں جنوبی افریقا کے بالرز کی تباہ کن بالنگ کے سامنے پاکستان کی بیٹنگ لائن مشکلات کا شکار ہے اور کھانے کے وقفے صرف 40 رنز پر7 کھلاڑی آؤٹ ہوچکے ہیں، فالو آن سے بچنے کیلئے اسے مزید14 رنز درکار ہیں اوراس کی 3 وکٹیں ابھی باقی ہیں۔ نیووینڈرر اسٹیڈیم جوہانسبرگ میں کھیلے جارہے پہلے ٹیسٹ کے دوسرے روزجنوبی افریقا کے پہلی اننگز کے اسکور 253 رنز کے جواب میں پاکستان نے 6 رنز بغیر کسی نقصان پر اپنی نامکمل اننگز کا آغاز کیا، مجموعی اسکور میں صرف تین رنز کے اضافے کے بعد محمدحفیظ 6 رنز بناکر اسٹین کی گیند پر ڈی ویلیئرز کو کیچ دے بیٹھے، اس کے بعد لائن لگ گئی اور ایک کے بعد ایک بیٹسمین پویلین واپس لوٹتا رہا، پاکستانی بیٹسمین پروٹیز کی شاندار بالنگ کے سامنے بالکل بے بس نظر آئے اور غیر ذمہ دارانہ شارٹ کھیل کر اپنی وکٹ گنواتے رہے۔ ناصر جمشید 2 ، یونس خان صفر، اسد شفیق ایک رن بناکر آؤٹ ہوئے، اظہر علی13 اور کپتان مصباح الحق 12 رنز کے ساتھ نمایاں رہے۔اسٹین نے 3 جبکہ فلینڈر اور کیلس نے دو، دو کھلاڑیوں کو آؤٹ کیا۔