29 مئی ، 2024 
بلوچستان: واشک میں مسافر بس کھائی میں جاگری، خواتین اور بچوں سمیت 29 افراد جاں بحق
29 مئی ، 2024
بلوچستان کے ضلع واشک میں مسافر بس کو حادثے کے نتیجے میں 29 افراد جاں بحق ہوگئے۔
جیونیو زکے مطابق بلوچستان کے ضلع واشک کے علاقے کلغلی میں مسافر بس کو حادثہ ٹائر پھٹنے کی وجہ سے پیش آیا، بس گوادر سے کوئٹہ جارہی تھی کہ ٹائر پھٹنے سے بس بے قابو ہوگئی اور کھائی میں جاگری جس کے نتیجے میں 6 افراد موقع پر ہی دم توڑ گئے۔
لیویز حکام کے مطابق حادثے کی اطلاع ملتے ہی امدادی کارروائیاں شروع کی گئیں اور زخمیوں کو بسیمہ اسپتال منتقل کیا گیا جہاں مزید 23 افراد زخموں کی تاب نہ لاتے ہوئے دم توڑ گئے، مرنے والوں میں خواتین اور بچے بھی شامل ہیں۔
لیویز حکام کا کہنا ہےکہ حادثے میں 25 افراد زخمی بھی ہوئے ہیں جن میں کئی کی حالت تشویشناک ہے جس کے باعث ہلاکتوں میں مزید اضافے کا خدشہ ہے۔
بس حادثےکے8 شدید زخمی کوئٹہ اور 4 خضدار منتقل کیےگئے ہیں۔
