بجٹ میں جی ایس ٹی شرح ایک فیصد بڑھانے اور تمام شعبوں کو معیاری شرح پر لانے پر غور

اسلام آباد: حکومت نے آئندہ بجٹ میں جی ایس ٹی کی شرح میں ایک فیصد اضافہ کرنے کے آپشنز پر غور شروع کردیا ہے تاکہ آئی ایم ایف کی شرائط کو پورا کیا جا سکے، حکومت اگر اس پر قائل ہوجاتی ہے تو جی ایس ٹی میں اضافےکے صرف اس ایک اقدام سے ہی 180 ارب روپے کی اضافی آمدن آئندہ بجٹ میں حاصل کی جاسکتی ہے۔

دی نیوز کو معلوم ہوا ہے کہ ایک اور تجویزبھی زیر غور ہے کہ جنرل سیلز ٹیکس (جی ایس ٹی) کی مختلف شرحوں کو ختم کرکے تمام شعبوں کو جی ایس ٹی کی معیاری شرح میں لایا جائے۔

ذاتی انکم ٹیکس (پی آئی ٹی) کے حوالے سے، آئی ایم ایف نے زیادہ آمدنی والے طبقے کے لیے ٹیکس کی شرح بڑھانے اور زیادہ سے زیادہ شرح کو 30 فیصد سے بڑھا کر 40 فیصد کرنے کا مشورہ دیا ہے تاہم، 100,000 روپے سے زیادہ پینشنرز کو لانے کی تجویز کو فی الحال ملتوی کردیا گیا ہے۔

بین الاقوامی مالیاتی فنڈ (آئی ایم ایف) نے پاکستانی اعلیٰ عہدیداروں کے ساتھ اپنا مسودہ رپورٹ شیئر کیا ہے اور آئندہ بجٹ میں سخت اقدامات کا مطالبہ کیا ہے جن میں جی ایس ٹی کی شرح میں 1 فیصد اضافہ اور ملازم طبقے کے اعلیٰ آمدنی والے طبقے کے لیے شرحوں میں اضافہ شامل ہیں۔

ایک اعلیٰ عہدیدار نے کہا ہے کہ مسودہ رپورٹ اور اقتصادی اور مالیاتی پالیسیوں کی یادداش زیر بحث ہے اور حکومت آئندہ بجٹ میں طے شدہ شرائط کو نافذ کرے گی تاکہ بجٹ کی منظوری کے بعد اسٹاف لیول ایگریمنٹ (SLA) پر دستخط کرنے کا راستہ ہموار ہو سکے۔

آئی ایم ایف اگلے بجٹ 2024-25 کے لیے ایف بی آر کی ٹیکس وصولی کا ہدف 12.9 ٹریلین روپے کے درمیان چاہتا ہے لیکن ایف بی آر ابھی بھی اصرار کر رہا ہے کہ اسے زیادہ سے زیادہ 12.5 ٹریلین روپے مقرر کیا جائے۔

آئی ایم ایف صوبوں کے ساتھ زرعی آمدنی کے ٹیکس کی شرح اور بنیاد (جیسے کٹوتیاں اور فرسودگی کی شرح) کو وفاقی سطح پر لاگو کرنے کے امکانات پر تبادلہ خیال کرنا چاہتا ہے۔

آئی ایم ایف موجودہ ایس ایم ای ٹیکس فریم ورک کو چودھویں شیڈول کے تحت منسوخ کرنا چاہتا ہے تاکہ مینوفیکچرنگ سیکٹر کے ٹیکسوں کو تمام مینوفیکچررز پر لاگو کیا جا سکے اور تعمیراتی شعبے کے لیے خصوصی ٹیکس کے نظام کو جلد از جلد ختم کر دیا جائے اور اس شعبے کو معیاری انکم ٹیکس کے نظام کے تحت لایا جا سکے۔

آئی ایم ایف نے ایک فرنٹ لوڈ پروگرام تجویز کیا ہے جس کے تحت حکومت کو ٹیکس کے محاذ پر بہت سخت فیصلے کرنے ہوں گے جیسے کہ جی ایس ٹی کی شرح میں کم از کم 1 فیصد اضافہ کرنا، جو معیاری شرح 18 فیصد سے بڑھ کر 19 فیصد ہو جائے گا۔

آئی ایم ایف نے جی ایس ٹی کی تمام مختلف شرحوں کو ختم کر کے معیاری شرح پر لانے کا بھی مطالبہ کیا ہے۔

ملازم طبقے کے لیے، یہ تجویز کیا گیا ہے کہ اعلیٰ طبقے کی آمدنی والے ٹیکس کو آئندہ بجٹ میں 30 فیصد سے بڑھا کر 40 فیصد کیا جائے۔ ملازم طبقے کے لیے انکم ٹیکس میں سات درجات ہیں اور آئی ایم ایف اسے چار درجات تک لانے کا مطالبہ کر رہا ہے۔

جہاں قابل ٹیکس آمدنی 60,00,000 روپے سے زیادہ ہو، ایف بی آر 880,000 روپے 60,00,000 روپے سے زیادہ کی رقم کا 30% چارج کرے گا۔ اب آئی ایم ایف تجویز کر رہا ہے کہ زیادہ سے زیادہ شرح کو 30 سے بڑھا کر 40 فیصد کر دیا جائے۔ جی ایس ٹی کی معقولیت کے حوالے سے، آئی ایم ایف نے تمام زیرو ریٹنگ (پانچویں شیڈول) کو ختم کرنے کی تجویز دی ہے سوائے برآمدات کے اور تمام دیگر اشیا کو معیاری شرح پر لانے کا کہا ہے۔

فنڈ نے چھٹے شیڈول کے تحت چھوٹ کو صرف رہائشی پراپرٹی کی سپلائی (سوائے پہلی فروخت) تک محدود کرنے اور تمام دیگر اشیا کو معیاری شرح پر لانے کا مطالبہ کیا ہے۔ اس سے خطے اور ابھرتی ہوئی معیشتوں کے اوسط کے مطابق ایندھن کی ٹیکسیشن بھی بڑھ جائے گی۔

آئی ایم ایف آٹھویں شیڈول کے تحت کم شرحوں کو ختم کرنے اور وہاں موجود اشیا کو معیاری شرح پر لانے کا مطالبہ کرتا ہے، سوائے چند ضروری اشیا جیسے غذائی اشیا اور اہم تعلیمی اور صحت کی اشیا کے جو 10 فیصد کی کم شرح پر ٹیکس عائد ہوں گی۔