14 ستمبر ، 2024 
اسلام آباد ہائیکورٹ کا شیر افضل کو بغیر اجازت کسی بھی مقدمے میں گرفتار نہ کرنے کا حکم
14 ستمبر ، 2024
اسلام آبادہائیکورٹ نے شیر افضل مروت کی کسی بھی مقدمے میں بغیر اجازت گرفتاری روک دی۔
اسلام آباد ہائیکورٹ کی جسٹس ثمن رفعت امتیاز نے شیرافضل مروت کی درخواست پر تحریری حکم نامہ جاری کردیا جس میں عدالت نے پی ٹی آئی رہنما کو کسی بھی مقدمے میں بغیر اجازت گرفتار کرنے سے روک دیا ہے۔
عدالت نے شیر افضل مروت کے خلاف مقدمات کی تفصیلات طلب کرتے ہوئے سیکرٹری داخلہ، آئی جی اسلام آباد، آئی جی پنجاب اور ایف آئی اے کو نوٹسز جاری کردیے جب کہ فریقین کو شیر افضل مروت کی درخواست پر پیراوائز کمنٹس جمع کرانےکا حکم دیا ہے۔
عدالتی حکم میں کہا گیا ہےکہ وکیل درخواست گزار کے مطابق شیر افضل مروت کوکسی خفیہ مقدمے میں گرفتاری کا خدشہ ہے، ان کو عدالت کی اجازت کے بغیرکسی بھی مقدمے میں گرفتار نہ کیا جائے۔
واضح رہے کہ شیرافضل مروت نے وکلا عادل عزیز قاضی اور ریاست علی آزاد کے ذریعے درخواست دائر کی تھی۔
