پاکستان کے آئین کے تحفظ کے لیے نکلنا ہے، منزل ڈی چوک ہے: وزیر اعلیٰ کے پی

وزیراعلیٰ خیبر پختونخوا علی امین گنڈاپور کا کہنا ہے کہ جب تک بانی پی ٹی آئی کا حکم نہیں ہوگا ، تب تک آگے جاتے جائیں گے۔

علی امین گنڈاپور سے صحافی نے سوال کیا کہ آپ کی واپسی کا کیا پلان ہے؟ جواب میں گنڈاپور نے کہا کہ واپسی کا آپ کو پتا چل جائے گا کہ کیا انتظامات ہیں،  جب تک بانی پی ٹی آئی کا حکم نہیں ہوگا ، تب تک آگے جاتے جائیں گے، منزل ڈی چوک ہے، پاکستان کے آئین کے تحفظ کے لیے نکلنا ہے۔

جیو نیوز سے بات چیت کرتے ہوئے وزیراعلیٰ علی امین گنڈا پور نے کہا کہ میرا اختیاربانی پی ٹی آئی کے پاس ہے وہ جو حکم دیں گے اس پرعمل کروں گا۔

پی ٹی آئی کا ڈی چوک پر احتجاج کا اعلان، اسلام آباد جانیوالے راستے بند، جڑواں شہروں میں موبائل سروس معطل

جڑواں شہروں میں دفعہ 144 نافذ کر دی گئی ہے اور سڑکوں کو کنٹینر لگا کر بند کر دیا گیا ہے

 انہوں نے مزید کہا کہ ہر صورت ڈی چوک پہنچنے کی کوشش کروں گا، احتجاج ملتوی کرنے کے لیے مجھ سے کسی نے رابطہ نہیں کیا، مجھ سے کسی کو بھی رابطہ کرنے کی ضرورت نہیں، بانی پی ٹی آئی ہماری ریڈ لائن ہیں ، وہ جو حکم دیں گے اس پر عمل ہوگا۔

 علی امین گنڈا پور کا کہنا تھا کہ ہمارا پرامن احتجاج ہے ، تشدد کیا گیا تو ذمہ دار تشدد کرنے والے ہوں گے، ہرصورت ڈی چوک جائیں گے، اکیلا بھی رہ گیا تو تب بھی جاؤں گا۔

خیال رہے کہ اس سےپہلے صوبائی وزیر ظاہر شاہ طورو نے وزیراعلیٰ کے پی سے وفاقی حکومت کے رابطوں کی تصدیق کی تھی۔