21 دسمبر ، 2024 
کراچی: جماعت اسلامی کا پانی کی عدم فراہمی کیخلاف 15 مقامات پر احتجاج، واٹر ٹینکرز کے وال کھول دیے
21 دسمبر ، 2024
کراچی میں جماعت اسلامی کی جانب سے شہر میں پانی کی عدم فراہمی کے خلاف 15 مقامات پر احتجاج کیا گیا۔
جماعت اسلامی کی جانب سے مظاہرے شارع فیصل، کالا پل، کورنگی کراسنگ، نیشنل ہائی وے، ناظم آباد، نارتھ ناظم آباد، فیڈرل بی ایریا، پی ای سی ایچ ایس اور گلشن اقبال میں کیے گئے۔
مشتعل مظاہرین نے نیپا اور حسن اسکوائر سے گزرنے والے واٹر ٹینکرز کے وال کھول دیے اور پانی سڑکوں پر بہا دیا، مظاہرین کا کہنا تھاکہ گھروں میں پانی نہیں تو ٹینکر مافیا کے پاس کیسے آرہا ہے؟
شہر میں بعض مقامات پر سڑکوں پر ٹائر جلائے گئے جس سے ٹریفک جام ہوگیا۔
امیر جماعت اسلامی کراچی منعم ظفر نے برنس روڈ پر مظاہرے سے خطاب میں کہا کہ پانی کے بحران کے ذمے دار میئر کراچی اور وزیر اعلیٰ سندھ ہیں، سندھ حکومت گھروں میں پانی فراہم کرنے کے بجائے واٹر ٹینکرز کے ذریعے پانی فروخت کر رہی ہے۔
