22 دسمبر ، 2024 
ملٹری کورٹ سے سزا یافتہ ملزمان آرمی چیف کے روبرو اپیل دائر کر سکیں گے: آئینی ماہرین
22 دسمبر ، 2024
اسلام آباد: آئینی ماہرین نے کہا ہے کہ ملٹری کورٹ سے سزا یافتہ افراد آرمی چیف کے روبرو اپیل دائر کر سکیں گے اور سزائیں بحال رہنے پرصدر پاکستان کو رحم کی اپیل کی جا سکے گی۔
سپریم کورٹ آف پاکستان نے 2023 میں ملٹری کورٹ کو سویلین کیس کا فیصلہ سنانے کا حکم امتناعی نہ جاری کیا ہوتا تو ہفتے کو فیلڈ کورٹ مارشل کی طرف سے یہ سزائیں 9 مئی کے کیس میں بہت پہلے سنائی جاچکی ہوتیں اور پھر 24 نومبرکو دارالحکومت پر یلغار نہ ہوتی، یہ سزائیں ہفتے کے روز 9 مئی کے 25 مجرموں کو مضبوط شہادت کی بنیاد پر سوچ بچار کے بعد سنائی گئی ہیں۔
سزا یافتہ مجرمان اب آرمی چیف کے روبرو اپیل دائر کرسکتے ہیں اور اگر سزائیں بحال رہتی ہیں تو صدر پاکستان کے روبرو آئین کے آرٹیکل 45 کے تحت مجرم رحم کی اپیل دائر کرسکیں گے۔
جی ایچ کیو کی جیگ برانچ کے قریبی ذرائع اور سویلین کورٹس کے وکلاء نے اپنے نام صیغہ راز میں رکھنے کی شرط پر بتایا کہ سپریم کورٹ بھی ملٹری کورٹ کی جانب سے دی گئی سزاؤں کو ریویو کرے گی۔
یاد رہے کہ گزشتہ روز ملٹری کورٹ نے 9 مئی کے واقعات میں ملوث 25 ملزمان کو سزا سنائی تھی جبکہ پاکستان تحریک انصاف کی جانب سے ان سزاؤں کو آئین سے متصادم قرار دیتے ہوئے سپریم کورٹ میں چیلنج کرنے کا اعلان کیا ہے۔
مزید خبریں :
عمران خان نے بیرسٹر سیف کو اہم ٹاسک سونپ دیا
3 گھنٹے پہلے
کراچی میں کڑاکے کی سردی، شہری ٹھٹھر گئے
7 گھنٹے پہلے
