29 جنوری ، 2025 
آئی سی سی نے مینز کرکٹر آف دی ایئر کا اعلان کر دیا
29 جنوری ، 2025
انٹرنیشنل کرکٹ کونسل (آئی سی سی) نے سرگار فیلڈ سوبرز مینز کرکٹر آف دی ایئر 2024 کا اعلان کر دیا۔
آئی سی سی کے سرگار فیلڈ سوبرز کرکٹر آف دی ایئر کے ایوارڈ کیلئے بھارت کے فاسٹ بولر جسپریت بمراہ، آسٹریلیا کے ٹریوس ہیڈ ، انگلینڈ کے جو روٹ اور ہیری بروک کو نامزد کیا گیا تھا۔
آئی سی سی کے مطابق بھارتی فاسٹ بولر جسپریت بمراہ سرگار فیلڈ سوبرز مینز کرکٹر آف دی ایئر 2024 قرارپائے۔وہ یہ اعزاز حاصل کرنے والے پہلے بھارتی فاسٹ بولر ہیں۔
جسپریت بمراہ نے سال 2024 میں شاندار کارکرگی دکھائی اور اپنی ٹیم کو ٹی ٹوئنٹی ورلڈکپ جتوانے میں اہم کردار ادا کیا۔
بمراہ گزشتہ سال سب سے زیادہ ٹیسٹ وکٹ لینے والے بولر بھی رہے۔انہوں نے 2024 میں 13 ٹیسٹ میچز میں 71 وکٹیں حاصل کیں۔
جسپریت بمراہ سرگار فیلڈ سوبرز مینز کرکٹر آف دی ایئر کا ایوارڈ جیتنے والے پانچویں بھارتی کرکٹر ہیں۔
اس سے قبل راہول ڈریوڈ، سچن ٹنڈولکر، روی چندرن ایشون اور ویرات کوہلی بھی یہ ایوارڈ جیت چکے ہیں۔
آئی سی سی مینز کرکٹر آف دی ایئر کا ایوارڈ جیتنے پر بمراہ نے خوشی کا اظہار کیا ہے۔
جسپریت بمراہ نے کہا کہ سر گارفیلڈ سوبرز ایوارڈ حاصل کرنا میرے لیے واقعی ایک اعزاز ہے، میں اس قدر حوصلہ افزائی پر شکر گزار ہوں۔ سال 2024 میرے لیے انتہائی خاص تھا، ہم نے آئی سی سی مینز ٹی ٹوئنٹی ورلڈ کپ جیتا اور دیگر فارمیٹ میں بھی اچھی کارکردگی دکھائی۔
واضح رہے کہ جسپریت بمراہ نے سال 2024 کے آئی سی سی ٹیسٹ کرکٹر آف دی ایئر کا ایوارڈ بھی اپنے نام کیا تھا۔
