کراچی…گورنر سندھ ڈاکٹر عشرت العباد نے کہا ہے کہ کراچی کے علاقے عباس ٹاوٴن میں دہشت گردی سے تباہ ہونے والے فلیٹس اور دکانوں کی دوبارہ تعمیرحکومت سندھ کرائیگی،کمشنر کراچی کو ریلیف کے کام کی نگرانی کی ہدایت کر دی ہے۔ گورنر سندھ ڈاکٹر عشرت العباد نے کہاکہ انتظامیہ کوہدایت کی ہے کہ عباس ٹاوٴن میں ریلیف کا کام موثرانداز میں کیا جائے۔ متحدہ قومی موومنٹ کے قائد الطاف حسین نے گورنرسندھ سے ٹیلی فون پرگفتگوکرتے ہوئے ہدایت دی تھی کہ دھماکے کے زخمیوں کے علاج معالجے پر بھرپور توجہ دی جائے اور بے گھرہونے والے متاثرین کی رہائش ،کھانے پینے اوربحالی کیلیے تمام وسائل بروئے کار لائے جائیں۔ رابطہ کمیٹی کے رکن مصطفٰی عزیزآباد ی نے لندن سے جاری بیان میں کہا ہے کہ سانحہ عباس ٹاوٴن پرقومی سیاسی ومذہبی رہنماوٴں کی بے حسی قابل مذمت ہے، جس نے ان نام نہاد قومی رہنماوٴں کااصل چہرہ قوم کے سامنے بے نقاب کردیاہے۔ ادھر حیدرآباد میں ایم کیوایم کے تحت محفل میلاد کے بعد میڈیا سے گفتگو میں ایم کیو ایم کے رہنما رضا ہارون نے سانحہ کراچی کو انسانیت کیخلاف سازش اور فرقہ واریت کی بدترین مثال قرار دیا۔ان کا کہنا تھا کہ ریاست عوام کے جان و مال کا تحفظ کرنے میں ناکام ہوگئی ہے۔