دلچسپ و عجیب

میک اپ میں مصروف خاتون نے سوئمنگ پول میں ڈوب جانیوالی بچی کو بچالیا

19 فروری ، 2025

میک اپ میں مصروف خاتون نے سوئمنگ پول میں ڈوب جانیوالی بچی کو بچالیا — یہ واقعہ چین میں پیش آیا / اسکرین شاٹ

چین میں ایک خاتون نے سوئمنگ پول میں ڈوب جانے والی ایک بچی کو بچا لیا حالانکہ انہیں ابتدائی طبی امداد دینے کا طریقہ بھی معلوم نہیں تھا۔

چین کے صوبے Yunnan کے ایک ہوٹل میں یہ واقعہ پیش آیا جہاں روایتی چینی گاؤن میں ملبوس خاتون کے چہرے پر ایک میک اپ ٹریٹمنٹ ماسک موجود تھا۔

وہ بچی ہوٹل کے اندر موجود سوئمنگ پول میں نہانے کے لیے اتری تو اس کے لیے خود پر کنٹرول رکھنا مشکل ہوگیا۔

دیگر افراد نے فوری طور پر بچی کو باہر نکالا مگر ابتدا میں زندگی کے آثار نظر نہیں آئے۔

پینگ لیانگ من نامی یہ خاتون اس وقت پول کے کنارے پر میک اپ ٹریٹمنٹ ماسک لگا رہی تھیں۔

جب خاتون نے بچی کو بظاہر مردہ دیکھا تو فوری طور پر اس کی جانب بڑھی اور زندگی کی جانب واپس لانے کی کوشش کرنے لگی۔

پینگ لیانگ کی بہن بھی اس موقع پر موجود تھیں اور انہوں نے ایمبولینس بلانے کے لیے فون کیا۔

پینگ لیانگ نے کسی ماہر طبی ماہر کی طرح بچی کے سینے کو دبایا اور دیگر کوششیں کیں اور 5 منٹ بعد بچی میں زندگی کے آثار نظر آنے لگے۔

پینگ لیانگ کے مطابق بچی کی ماں نے اسے پول میں فلوٹ رنگ کے ساتھ اکیلے کھیلنے کے لیے بھیج دیا تھا مگر بچی نے رنگ کو گرا دیا۔

ہوٹل کا عملہ اس وقت پول کے پاس موجود نہیں تھا اور پینگ لیانگ کی کوششوں سے زندگی کی جانب واپس آنے والی بچی اب اسپتال میں زیرعلاج ہے۔

پینگ لیانگ نے بتایا کہ انہوں نے ابتدائی طبی امداد دینے کی تربیت حاصل نہیں کی مگر ایک بچے کی ماں کی حیثیت سے وہ سوشل میڈیا پر ایمرجنسی ٹریٹمنٹ کے طریقے دیکھتی رہتی ہیں۔