22 فروری ، 2025
ہیڈکوچ پاکستان کرکٹ ٹیم عاقب جاویدکا کہنا ہےکہ ہمارے پلیئرز دبئی کی کنڈیشن سے واقف ہیں، بھارت کے خلاف کچھ خاص کرنےکی کوشش کریں گے۔
دبئی میں پریس کانفرنس کرتے ہوئے عاقب جاوید کا کہنا تھا کہ ہمارے پاس میچ ونر فاسٹ بولرز ہیں، شاہین شاہ آفریدی اور نسیم شاہ سے کافی امیدیں ہیں، ہمیں اپنی صلاحیتوں کے مطابق کرکٹ کھیلنی ہے۔
عاقب جاوید کا کہنا تھا کہ بھارت کے خلاف میچ ایک موقع ہےکہ ٹیم اور کھلاڑی دنیا کے سامنے اپنا نام کماسکتے ہیں، میڈیا لکھتا ہے ’داغ لگ گئے، داغ دھل گئے‘ پلئیرز کا کام کھیلنا ہے۔
پاکستان کرکٹ ٹیم کے ہیڈکوچ نےکہا کہ پاکستان اور بھارت کے میچ کا نام ہی کافی ہے، سارے شائقین کو اسٹیڈیم سے باہر نکال دیں پھر بھی پاک بھارت میچ کا دباؤ رہےگا، دباؤ کو مینج کرنا ہی کھلاڑیوں کا کام ہے، پاک بھارت میچ سے دباؤ ختم کردیں تو کیا بچے گا؟ دباؤ کا ہی تو مزا ہے، پاک بھارت ٹاکرا ہائی وولٹیج، دلچسپ اور کرکٹ کی روح ہے۔