4 ٹانگوں والے نوجوان کی کامیاب سرجری، اضافی ٹانگیں جسم سے الگ کر دی گئیں

بھارت میں ڈاکٹروں نے پیدائشی طور پر 4 ٹانگوں والے نوجوان کی کامیاب سرجری کر کے اس کی زندگی آسانی بنادی۔

بھارتی میڈیا کے مطابق  نئی دہلی کے آل انڈیا انسٹی ٹیوٹ آف میڈیکل سائنسز  کے ڈاکٹروں نے شاندار طبی کارنامہ انجام دیتے ہوئے 17 سالہ لڑکے کی کامیاب سرجری کی، جو پیدائشی طور پر 4 ٹانگوں کے ساتھ پیدا ہوا تھا۔ 

نوجوان کی 2 اضافی ٹانگیں اس کے پیٹ سے جڑی ہوئی تھیں۔تاہم آپریشن کے بعد اضافی ٹانگیں الگ کر دی گئیں۔

آل انڈیا انسٹی ٹیوٹ آف میڈیکل سائنسز کے ڈاکٹر کرشنا کے مطابق17 سالہ لڑکا اتر پردیش کے ضلع بالیا سے تعلق رکھتا ہے اور اسے 28 جنوری کو اسپتال لایا گیا تھا۔ جب ڈاکٹروں نے اس کا معائنہ کیا تو دیکھا کہ اس کے پیٹ پر کپڑا لپٹا ہوا تھا اور اس کے نیچے 2 اضافی ٹانگیں جھول رہی تھیں۔

ڈاکٹرنے بتایا کہ ان اضافی ٹانگوں کے باعث اس لڑکے کے جسم کی نشوونما درست طریقے سے نہیں ہو رہی تھی اور یہ اس کے دیگر اعضا کو بھی نقصان پہنچا سکتی تھیں۔ 

 یہ لڑکا آٹھویں جماعت میں پہنچا تو اسے اپنی تعلیم بھی چھوڑنی پڑی، کیونکہ جسمانی مشکلات کے علاوہ، لوگ اس کا مذاق بھی اُڑاتے تھے، جس کا اس کی ذہنی صحت پر بھی گہرا اثر پڑا۔

بھارتی میڈیا کے مطابق ڈاکٹر کرشنا نے بتایا کہ اس قسم کے کیسز، جنہیں طبی زبان میں Incomplete Parasitic Twins کہا جاتا ہے، ایک کروڑ افراد میں صرف ایک بار دیکھنے کو ملتے ہیں۔  یہ اس وقت ہوتا ہے جب جڑواں بچوں کا حمل ٹھہرتا ہے، لیکن ان میں سے ایک کا جسم مکمل طور پر نشوونما نہیں پاتا اور اس کے اعضا دوسرے بچے کے جسم سے جُڑ جاتے ہیں۔

ذرائع کے مطابق دنیا بھر میں اب تک صرف 42 ایسے کیسز رپورٹ ہوئے ہیں، جن میں کسی انسان کے جسم میں 4 ٹانگیں موجود ہوں۔

یہ آل انڈیا انسٹی ٹیوٹ آف میڈیکل سائنسز نئی دہلی میں اپنی نوعیت کا پہلا کیس تھا۔