انگلینڈکیخلاف شاندار اننگز، ابراہیم زادران نےکپل دیو کا ریکارڈ توڑ دیا

لاہور: آئی سی سی چیمپئنز ٹرافی کے آٹھویں میچ میں نوجوان افغان بیٹر ابراہیم زادران نے شاندار 177 رنز کی اننگز کھیل کر متعدد ریکارڈ بنادیے، انہوں نے سابق بھارتی کپتان کپل دیو کا ریکارڈ بھی توڑ دیا۔

23 سالہ افغان اوپنر ابراہیم زادران نے بہترین بلے بازی کا مظاہرہ کرتے ہوئے شاندار سنچری اسکور کی اور 146 گیندوں پر 177 رنز بنا کر آخری اوور میں آؤٹ ہوئے، 23 سالہ بیٹر کی اننگز میں 6 چھکے اور  12 چوکے شامل تھے۔ 

 ابراہیم زادران نے اس میچ میں کئی ریکارڈ قائم کیے، وہ آئی سی سی چیمپئنز ٹرافی میں سنچری اسکور کرنے والے پہلے افغان بیٹر بن گئے ہیں، وہ افغانستان کی جانب سے ورلڈکپ  میں بھی سنچری بنانے والے پہلے بیٹر ہیں۔

چیمپئنز ٹرافی: ابراہیم زادران کی شاندار سنچری، افغانستان نے انگلینڈکو 326 رنز کا ہدف دے دیا

افغان بیٹر ابراہیم زادران نے شاندار سنچری اسکور کی اور 146 گیندوں پر 177 رنز کی اننگز کھیل کر آؤٹ ہوئے

ابراہیم زادران ون ڈے کرکٹ میں افغانستان کی جانب سے سب سے بڑی انفرادی اننگز کھیلنے والے کھلاڑی بھی ہیں، انہوں نے 177 رنز بنا کر اپنا ہی 162 رنز کا ریکارڈ توڑا ہے۔

 ابراہیم زادران 177 رنز کے ساتھ چیمپئنز ٹرافی کی ایک اننگز میں سب سے زیادہ اسکور کرنے والے کھلاڑی بھی بن گئے ہیں، ان سے قبل یہ اعزاز  انگلش بیٹر بین ڈکٹ کے پاس تھا جنہوں نے  اسی ایونٹ میں گزشتہ ہفتے آسٹریلیا کے خلاف کھیلتے ہوئے 166 رنز کی اننگز کھیلی تھی۔

ابراہیم زادران آئی سی سی ون ڈے ایونٹس میں بڑا اسکور بنانے والے ایشن بیٹرز میں لیجنڈ بھارتی بیٹر کپل دیو  کو پیچھے چھوڑ کر دوسرے نمبر پر آگئے ہیں۔ کپل دیو نے 1983 کے ورلڈکپ میں 175 رنز کی اننگز کھیلی تھی، اس فہرست میں پہلے نمبر پر سارووگنگولی ہیں  جنہوں نے 1999 کے ورلڈ کپ میں سری لنکا کے خلاف 183 رنز بنائے تھے۔

اس کے علاوہ  ابراہیم زادران ون ڈے کرکٹ کی کم ترین اننگز میں 6 سنچریاں بنانے والے بیٹرز کی فہرست میں بھی شامل ہوگئے ہیں۔

ابراہیم زادران نے صرف 35 اننگز میں یہ کارنامہ انجام دیا ہے، وہ کوئنٹن ڈی کاک، ڈیرل مچل اور شبمن گل کے ساتھ اس فہرست میں شامل ہوگئے ہیں۔