26 فروری ، 2025 
حماس نے آج رات 4 اسرائیلی یرغمالیوں کی لاشیں حوالے کرنے کا اعلان کردیا
26 فروری ، 2025
فلسطینی مزاحمتی تنظیم حماس نے آج رات 4 اسرائیلی یرغمالیوں کی لاشیں حوالے کرنے کا اعلان کردیا۔
حماس کے عسکری ونگ القسام بریگیڈز کے ترجمان ابوعبیدہ نے اسرائیل کے حوالے کیے جانے والے ہلاک یرغمالیوں کی شناخت ظاہر کردی۔
ابوعبیدہ کے مطابق بدھ کی رات 4 ہلاک یرغمالیوں کی لاشیں اسرائیل کے حوالے کرنے کا فیصلہ کیا گیا ہے، یہ لاشیں اتساحی عیدان، ایتسیک الجریط، اوھاد یہلومی اور شلومو منصور نامی یرغمالیوں کی ہیں۔
دوسری جانب فلسطینی قیدیوں کی تنظیم مکتب اعلام الاسریٰ نے کہا ہے کہ آج رات اسرائیلی جیلوں سے رہا کیے جانے والے قیدیوں کے پہلے گروپ کے استقبال کے لیے غزہ پٹی کے علاقہ خان یونس میں تیاریاں مکمل کرلی گئی ہیں۔
یاد رہےکہ گزشتہ ہفتے قیدیوں کی رہائی کے حوالے سے پیدا ہونے والے بحران کو حل کرنے کے لیے حماس اور اسرائیل کے درمیان 4 مزید یرغمالیوں کی لاشوں کے بدلے 620 فلسطینی قیدیوں کی رہائی پر اتفاق ہوا تھا۔
