04 مارچ ، 2025 
رضوان کی کپتانی فراری سے رکشہ پر چلی گئی: محمد عامر
04 مارچ ، 2025
پاکستان کے سابق فاسٹ بولر محمد عامر نے بطور کپتان وکٹ کیپر بلے باز محمد رضوان کی فیصلہ کرنے کی صلاحیتوں پر اپنے عدم اعتماد کا اظہار کرتے ہوئے تنقید کا نشانہ بنایا۔
جیو نیوز کے پروگرام ہارنا منع ہے میں عامر نے گفتگو کرتے ہوئے انکشاف کیا کہ میں ہمیشہ ہی ڈومیسٹک کرکٹ اور پاکستان سپر لیگ (پی ایس ایل) کے دوران رضوان کی کپتانی کی تعریف کرتا تھا لیکن اب ان کے فیصلے تبدیل ہوچکے ہیں۔
محمد عامر نے ہنستے ہوئے کہا 'رضوان، آپ اب فراری سے رکشہ پر جاچکے ہیں، پی ایس ایل میں ان کی کپتانی کی صلاحیتوں کی وجہ سے ان کی ٹیم کئی بار ٹورنامنٹ کے فائنل میں پہنچی'۔
انہوں نے کہا کہ 'رضوان کی فیصلہ سازی بالکل بدل گئی ہے، مجھے سمجھ نہیں آتا کہ اس تبدیلی کی کیا وجہ ہے، کیونکہ میں اس عرصے کے دوران ان کے ساتھ ڈریسنگ روم میں نہیں رہا، ان کے انتخاب اب غیر معمولی معلوم ہوتے ہیں'۔
فاسٹ بولر کا مزید کہنا تھا کہ 'اگر رضوان یہ دعویٰ کرتے ہیں کہ انہیں ٹیم کے انتخاب پر کوئی اختیار نہیں، تو یہ بات کسی صورت درست نہیں ہے، رضوان ایک مؤثر کھلاڑی ہیں اور اسی نے انہیں کپتان بننے میں مدد کی، رضوان یہ ہی صلاحیت ٹیم کی تشکیل کے لیے استعمال کرسکتے تھے، لیکن انہوں نے یہ دلیرانہ قدم نہیں اٹھایا، اور اس کی وجہ مجھے سمجھ نہیں آتی۔
