آج افطاری میں بکلاوا بنائیں اور تعریفیں سمیٹیں

آج کی افطاری میں کیوں ناں گھر والوں کو بکلاوا بنا کر کھلایا جائے جس سے سب گھر والے خوش ہوجائیں۔

بکلاوا ایک ترک مٹھائی ہےجو  بہت پسند کی جاتی ہے۔

اجزاء: چینی 4 پیالی، بریڈ کرمبز ایک چوتھائی پیالی، پسی ہوئی دار چینی ڈیڑھ چمچ، ڈو شیٹ 40 عدد، بغیر نمک کا مکھن (پگھلا ہوا) 450گرام، دارچینی کا ٹکڑا ایک عدد۔

ترکیب: اوون کو 300 ڈگری سینٹی گریڈ پر گرم کریں، بادام، آدھی پیالی چینی، بریڈ کرمب اور پسی ہوئی دار چینی ایک پیالی میں ڈال کر ملائیں اور ایک جانب رکھ چھوڑیں۔

اب ڈو شیٹ کو 11''x15''x2'' کے بیکنگ پین کے مطابق کاٹ کر پین میں سیٹ کرلیں۔

پگھلے ہوئے مکھن کو پین میں لگائیں اور ڈو شیٹ کی پہلی تہہ پین میں بچھا دیں، اب اس پر مکھن لگائیے اور 2 چمچ بادام کا مرکب اس پر چھڑک دیں۔

اب ایک شیٹ پر مکھن لگائیں اور مکھن والی سطح پین میں موجود بادام کے مرکب پر رکھ دیں، دو شیٹ اوپری سطح کے لیے چھوڑ کر باقی تمام ڈو شیٹوں کو اسی طرح لگاتی جائیں۔ آخری دو شیٹ کے درمیان مکھن لگا کر اسے پین میں رکھ کر کنارے بند کریں اور اوپر سے ایک بار پھر مکھن لگائیں۔

چھری کی مدد سے اب پین میں موجود شیٹ کو 2 انچ کے فاصلے سے کاٹنا شروع کیجیے اور برابر سے آٹھ قطار کاٹ لیں، اب تھوڑا سا پانی چھڑکیں، بیکنگ پین کو پارچمنٹ پیپر کی مدد سے ڈھک دیں اور اوون میں تقریباً ڈیڑھ گھنٹہ رکھ دیں، دوسری جانب بقیہ چینی، لیموں کا رس، دار چینی کا ٹکڑا اور دو پیالی پانی کسی پین میں دھیمی آنچ پر گرم کر کے شیرینی تیار کر لیں۔

 اب بکلاوا اوون سے نکالیے، پارچمنٹ پیپر ہٹا دیجیے اور تیار شیرینی بکلاوا کے اوپر انڈیل دیں، اس دوران بیکنگ پین کو اچھی طرح ہلائیں تاکہ شیرینی اچھی طرح ہر جانب پہنچ جائے، ٹھنڈا ہونے پر اسے چوکور ٹکڑوں کی شکل میں کاٹ لیں۔

 مزیدار بکلاوا تیار ہے۔