لندن … متحدہ قومی موومنٹ کے قائد الطاف حسین نے بلوچستان کے علاقے زیارت میں تاریخی ثقافتی ورثے قائد اعظم ریزیڈنسی پر حملے کی سخت ترین الفاظ میں مذمت کی ہے اور آتشزدگی کے باعث پوری تاریخی عمارت خاکستر ہونے پر گہرے دکھ اور افسوس کااظہار کیا ہے۔ ایک بیان میں الطاف حسین نے کہاکہ زیارت میں قائداعظم ریزیڈنسی، پاکستان کاتاریخی ثقافتی ورثہ تھی اور بانی پاکستان قائداعظم محمد علی جناح کی چند تاریخی نشانیوں میں سے ایک تھی جسے تباہ کرکے پاکستان کے تاریخی ثقافتی ورثے کو نقصان پہنچایاگیا ہے۔ الطاف حسین نے کہاکہ مہذب قومیں امن و جنگ کے زمانوں میں بھی اپنے اپنے علاقوں میں موجود قدیم تاریخی یادگاروں کی بطور ثقافتی ورثہ حفاظت کیا کرتی ہیں، چاہے یہ ثقافتی ورثہ دشمنوں کے قبضے میں ہی کیوں نہ چلا جائے۔ انہوں نے کہاکہ زیارت میں قائداعظم ریزیڈنسی جیسے تاریخی ثقافتی ورثے کو تباہ کرکے پاکستان کی تاریخ اورثقافت پر حملہ کیا گیا ہے جس کی جتنی بھی مذمت کی جائے کم ہے۔ الطاف حسین نے حکومت سے مطالبہ کیا کہ قائداعظم ریزیڈنسی پر حملے اور قدیم ثقافتی ورثہ کی تباہی کا سنجیدگی سے نوٹس لیاجائے اور اس کے ذمہ داروں کے خلاف سخت ترین کارروائی کی جائے ۔