کراچی......ایم کیوایم کے قائدالطاف حسین کی خصوصی ہدایت پر محرم الحرام میں فرقہ وارانہ ہم آہنگی برقرار رکھنے اور ماتمی جلوسوں کی گزرگاہوں پرلائٹنگ ، روڈوں کی استر کاری ، صفائی ستھرائی اور دیگر انتظامات کیلئے بدھ کے روز خورشید بیگم سیکریٹریٹ عزیز آباد میں کراچی کی تمام امام بارگاہوں کے ٹرسٹیز کا ایک جلاس ہوا جس سے رابطہ کمیٹی کے ارکان سیدحیدرعباس رضوی ، عبد الحسیب عامرخان اورسیف یارخان نے خطاب کیا ۔ اجلاس میں رابطہ کمیٹی کے ارکان نے حق پرست ارکان قومی وصوبائی اسمبلی کی ان کے حلقہ انتخاب کی امام بارگاہوں کے ٹرسٹیز سے ملاقات کرائی اس موقع پر امام بارگاہوں کے ٹرسٹیز نے حق پرست ارکان قومی وصوبائی اسمبلی کو محرم الحرام کے جلوسوں کی گزرگاہوںپرکرائے جانے والے لائنٹنگ ،سڑکوں کی استر کاری ، صفائی ستھرائی اور دیگر تفصیلات فراہم کیں جن پر حق پرست اراکین قومی وصوبائی اسمبلی نے اپنے ہر ممکن تعاون کا یقین دلایا ۔ اجلاس سے خطاب کرتے ہوئے حیدر عباس رضوی نے کہاکہ قائد تحریک الطاف حسین محرم الحرام کے موقع پر تمام مکاتب فکر کے درمیان فرقہ وارانہ ہم آہنگی ، مذہبی راواداری اوربھائی چارے کا درس دیا ہے اور جو عناصر محرم الحرام کے موقع پر شرانگیزی اور قتل و غارتگری کی سازشوں کے ذریعے مسلم امہ کو آپس میں دست و گریباں کرنا چاہتے ہیں وہ الطا ف حسین اور ایم کیوایم کے ہوتے ہوئے کبھی کامیاب نہیں ہوسکتے ۔ رکن رابطہ کمیٹی عبدالحسیب نے کہا کہ حق پرست ارکان قومی و صوبائی اسمبلی نے آج امام بارگاہوں کے ٹرسٹیز سے محرم الحرام کے موقع پر نکلنے والے جلوسوں کی گزرگاہوں پر انتظامات کی تفصیلات معلوم کی ہیں اورالطاف حسین کی خصوصی ہدایت پر انشاء اللہ تعالیٰ جلوسوں کی گزرگاہوں پر حق پرست ارکان قومی وصوبائی اسمبلی اپنے فنڈز سے لائٹنگ ، سڑکوںکی استر کاری اور صفائی و ستھرائی کے انتظامات کرائیں گے ۔ عبد الحسیب نے تمام مکاتب فکر کے عوام سے اپیل کی کہ وہ محرم الحرام کے موقع پر اپنے ارد گرد مشکوک عناصر پر کڑی نظر رکھیں اور ان کی اطلاع قریبی پولیس اسٹیشن اور انتظامیہ فوری طورپر دیں ۔