دبئی......دبئی ٹیسٹ کے چوتھے روز پاکستان کی پوری ٹیم 393رنز بناکر آئوٹ ہوگئی،یوں نیوزی لینڈ نے پہلی اننگز میں 10رنز کی برتری حاصل کرلی۔سرفراز احمد نے شاندار سنچری اسکور کی۔پاکستان نے گذشتہ روز کے اسکور 281رنز 6کھلاڑی آئوٹ پر نامکمل اننگزشروع کی۔یاسر شاہ صرف 2رنز بناکر آئوٹ ہوئے ۔احسان عادل نے بغیر کوئی رن بنائے پویلین کی راہ لی۔ذوالفقار بابر بھی زیادہ دیر وکٹ پر نہ ٹھہر سکے اور صرف 5رنز آئوٹ ہوگئے۔اسی دوران سرفراز احمد نے ذمہ دارانہ بیٹنگ کرتے ہوئےسنچری مکمل کی ، جو ٹیسٹ کیریئر میں ان کی تیسری سنچری ہے۔سرفرازاحمد ایک سال میں تین سنچریاں بنانے والے پہلے پاکستانی وکٹ کیپر بن گئے ہیں۔کھانے کے وقفے کے فوری بعد سرفراز احمد انفرادی اسکور میں صرف ایک رن کا اضافہ کرکے 112پر آئوٹ ہوگئے، یوں نیوزی لینڈ کے پہلی اننگز کے اسکور 403رنز کے جواب میں پاکستان کی پوری ٹیم 393رنز بناکر آئوٹ ہوگئی، اس طرح کیویز نے پہلی اننگز میں 10رنز کی برتری حاصل کرلی۔نیوزی لینڈ کی طرف سےسائوتھی نے تین، بائولٹ اور سوڈھی نے دو، دو جبکہ کریگ ، نیشام اور مک کلم نے ایک، ایک وکٹ حاصل کی۔تین میچوں پر مشتمل سیریز میں پاکستان کو ایک ۔صفر کی برتری حاصل ہے۔