’دبئی میں کسی کو چپ کرانے نہیں آئے‘، آسٹریلوی کپتان کا بھارت سے سیمی فائنل پر تبصرہ

 آسٹریلیا کے کپتان اسٹیو اسمتھ نے کہا ہے وہ چیمپئنز  ٹرافی کے سیمی فائنل میں اچھا کھیل پیش کرنے کی کوشش کریں گے، دبئی میں کسی کو چپ کرانے نہیں آئے ہیں۔

آسٹریلوی کپتان دبئی کرکٹ اسٹیڈیم میں پریس کانفرنس کرنے آئے تو صحافیوں نے سوالات کی گوگلی بھی کرائی اور بانسر بھی البتہ تجربہ کار اسٹیو اسمتھ نے محتاط اور دوٹوک جوابات ديے۔

اسٹیو اسمتھ نے ورلڈکپ 2023 کے فائنل میں بھارت کو شکست دینے اور شائقین کو مکمل خاموش کرانے سے متعلق سوال کا جواب دیتے ہوئے کہا کہ وہ کھیل میں بہترین کارکردگی دکھانے پر یقین رکھتے ہیں، شائقین کو خاموش کرانے پر نہیں۔ 

انہوں نے کہا کہ بھارتی ٹیم مسلسل دبئی میں کھیل رہی ہے اور اچھی کارکردگی دکھا رہی ہے، سیمی فائنل کڑا معرکہ ہوگا جس کا بے صبری سے انتظار ہے۔

چیمپئنز ٹرافی: سیمی فائنل میں کون کس کا سامنا کرےگا؟ فیصلہ ہوگیا

چیمپئنز ٹرافی کا پہلا سیمی فائنل 4 مارچ کو دبئی اور دوسرا سیمی فائنل 5 مارچ کو لاہور میں کھیلا جائے گا

بھارت کے ناقابل شکست ریکارڈ اور دبئی کے حالات سے واقفیت کے بارے میں سوال کے جواب میں آسٹریلوی کپتان نے کہا کہ بھارتی ٹیم موجودہ کنڈیشنز کو اچھی طرح سمجھتی ہے، پچ خشک ہے اور اس پر کافی گیمز ہوچکی ہیں جو اسپنرز کے لیے مددگار ہوگی۔

انھوں نے کہا کہ آسٹریلین ٹیم خوب سے خوب تر کھیلنے کے لیے پرعزم ہے اور 2 اچھی ٹیموں کے درمیان سخت مقابلہ ہوگا۔

بھارتی اسپنرز خاص طور پر ورون چکرورتی کے خطرے سے نمٹنے کے بارے میں آسٹریلوی کپتان اسمتھ کا کہناتھا کہ چکرورتی سمیت تمام بھارتی اسپنرز اعلیٰ معیار کے ہیں، اس میچ کا نتیجہ اس بات پر منحصر ہوگا کہ ہم مڈل اوورز میں ان کے اسپنرز کو کیسے کھیلتے ہیں، ہمارے پاس مختلف آپشنز ہیں۔

بھارت کے خلاف پاورپلے میں مضبوط آغاز پر انہوں نے کہا کہ ٹریوس ہیڈ جیسے کھلاڑی کا جارحانہ کھیل ہمیں ایک شاندار آغاز دے سکتا ہے، وہ بڑے میچز میں ہمیشہ پرفارم کرتے ہیں اور کل بھی ہم ان سے یہی توقع رکھیں گے۔

پاکستان میں سخت سکیورٹی کے دوران کھیلنے کے تجربے پر بات کرتے ہوئے اسٹیو اسمتھ نے کہا کہ پاکستان میں سخت حصار سے نکل کر دبئی میں ری سیٹ اور ٹریننگ کا موقع ملا جس سے ہمیں کنڈیشنز کے مطابق خود کو ایڈجسٹ کرنے میں مدد ملی۔

انہوں نے کہا کہ دبئی میں کچھ کھلاڑیوں نے گالف کھیلی تو کچھ نے ریلکس ہوکر ٹریننگ کی۔

چیمپیئنز ٹرافی کے پہلا سیمی فائنل کل بھارت اور آسٹریلیا کے مابین دبئی میں کھیلا جائے گا۔

چیمپئنز ٹرافی کے سیمی فائنلز کے میچ آفیشلز کا اعلان

لاہور میں دوسرا سیمی فائنل 5 مارچ کو نیوزی لینڈ اور جنوبی افریقا کے درمیان ہو گا

آسٹریلیا شاندار ٹیم اور ناک آؤٹ مرحلے میں سخت حریف ہے: روہت شرما

آسٹریلیا سے جیت کے لیے بیٹنگ اور بولنگ یونٹ کے طور پر بہترین کارکردگی دکھانی ہو گی: کپتان بھارتی ٹیم