کراچی..........کراچی کے علاقے سہراب گوٹھ میں مبینہ پولیس مقابلے میں 13دہشت گرد ہلاک ہوگئے۔ پولیس نے ایک دہشت گرد کو خودکش جیکٹ کے ساتھ گرفتار کرنے کا دعویٰ بھی کیا ہے۔سہراب گوٹھ میں الآصف اسکوائر کے قریب افغان بستی میں پولیس نے دہشت گردوں کی موجودگی کی اطلاع پر آپریشن کیا۔ جس میں ملیر ضلع کی پولیس اور کمانڈوز نے حصہ لیا۔ آپریشن کے دوران علاقے کے داخلی اور خارجی راستوں کو سیل کرکے ایک مکان پر چھاپہ مارا گیا جہاں موجود دہشت گردوں نے پولیس پرجدید ہتھیاروں سے فائرنگ شروع کردی۔ جوابی فائرنگ کے نتیجے میں کالعدم تنظیم سے تعلق رکھنے والے 13مبینہ دہشت گرد ہلاک ہوگئے۔ ایس ایس پی ملیر راؤ انوار نے انکشاف کیا کہ آپریشن کالعدم تحریک طالبان کے کمانڈر کے ڈیرے پرکیا گیا تھا۔ ہلاک دہشت گردوں کے قبضے سے اسلحہ، دھماکہ خیز مواد اور خود کش جیکٹیں ملی ہیں۔ ان دہشت گردوں میں سے 4کا تعلق القاعدہ اور 9کا کالعدم تحریک طالبان پاکستان سے تھا جبکہ ایک دہشت گرد کو خود کش جیکٹ سمیت گرفتار بھی کیا گیا ہے۔ مقابلے میں ہلاک ہونے والے القاعدہ کے دہشت گردوں نے پولیس کی یونیفارم پہن رکھی تھی۔