اسلام آباد … عالمی ادارہ صحت نے انکشاف کیا ہے کہ لاہور، راولپنڈی اور ملتان میں پولیو وائرس موجود ہے، محکمہ صحت نے تینوں شہروں کو انتہائی حساس قرار دے کر ان ضلاع میں اضافی پولیو مہم چلانے کا فیصلہ کیا ہے۔ عالمی ادارہ صحت نے لاہور، راولپنڈی اور ملتان میں سیوریج کے پانی کا لیبارٹری ٹیسٹ کیا، گزشتہ 6 ماہ کے دوران لئے گئے ہر نمونے میں پولیو وائرس کی تصدیق ہوئی۔ محکمہ صحت پنجاب نے پولیو سے نجات کیلئے ان تینوں اضلاع میں 2 اضافی مہم چلانے کا اعلان کیا ہے۔ پاکستان میں 2011ء میں 198 پولیو کیسز سامنے آئے تھے، اس برس اب تک پولیو کے 15 کیسز کی تصدیق ہو چکی ہے۔ پنجاب میں ایک، سندھ میں 2، خیبرپختونخواہ 4 ، فاٹا 6 اور بلوچستان میں پولیو کے 2 کیسز کی تصدیق کی جاچکی ہے۔ طبی ماہرین نے والدین پر زور دیا ہے کہ وہ پولیو سے بچاوٴ کیلئے 5 سال سے کم عمر بچوں کو ویکسین ضرور پلائیں۔ ڈاکٹروں کا کہنا ہے کہ مطلوبہ نتائج حاصل کرنے کیلئے انسداد پولیو مہم کو مزید موٴثر بنانے کی ضرورت ہے۔ طبی ماہرین کا کہنا ہے کہ پولیو ایک خطرناک مرض ہے اس سے بچاوٴ کیلئے حکومتی سطح پر اقدامات کے ساتھ عوام میں شعور اجاگر کرنا بھی انتہائی ضروری ہے۔