کراچی.... رفیق مانگٹ.......امریکا کی عدالت میں اس وقت دلچسپ صورتحال پیدا ہوگئی جب ایک لڑکی کو علم ہوا کہ وہ پچھلے 18 سال سے شادی شدہ ہے۔ کہاوت ہے نہ جان نہ پہچان میں تیرا مہمان،لیکن امریکی ریاست نیویارک میں تو نہ جان نہ پہچان نہ ہی ملاقات اور بنا درشن کے ہی،ایک پاکستانی شہری امریکی دوشیزہ کا میاں بن گیا!اس بات کا پتا ایبونی والٹن کو اس وقت چلا،جب وہ اپنے اصل سیاں جی سے شادی کا اجازت نامہ لینے عدالت پہنچی،مگر عدالتی رکارڈ کے مطابق وہ تو پہلے ہی 18 سال سے ایک عدد میاں جی کی ہوچکی ہے۔عدالت نے اسے بتایا کہ بی بی آپ نے 1997 میں گوجرانوالہ کے ایک شہری سے شادی کی تھی۔اس خبر سے امریکی دوشیزہ کے طوطے ہی اڑ گئے۔اس نے عدالت کو بتایا کہ اس کی کزن نے اس کا شناختی کارڈ چوری کرکے استعمال کیا ہے۔متاثرہ لڑکی کا موقف درست پاتے ہوئے،عدالت نے اسے شادی کی منظوری دیتے ہوئے اپنے من پسند سیاں سے شادی کی آزادی دےدی۔ امریکی اخبار ”نیو یارک پوسٹ “ نے گرین کارڈ کے حصول کےلئے عارضی شادی کے اس واقعے کی رپورٹ میں لکھا کہ گزشتہ برس امریکی خاتون ایبونی والٹن شادی کا اجازت نامہ لینے عدالت پہنچی تو یہ خبر اسے صدمے سے دو چار کر گئی کہ وہ تو پہلے سے شادی شدہ ہے اور اس کا وہ شوہر ہے جسے وہ زندگی میں کبھی ملی ہی نہیں۔رپورٹ کے مطابق 35سالہ والٹن اپنے اٹھارہ سال سے دوست کے ساتھ شادی کے رشتے میں بندھنے کے لئے میرج آفس پہنچی تو شہری حکام نے اسے شادی کا اجازت نامہ دینے سے اس لئے انکار کردیا کہ عدالتی ریکارڈ کے مطابق وہ پہلے سے شادی شدہ ہے۔ سٹی کلرک آفس کے مطابق والٹن نے دس دسمبر1997میں گوجرانوالہ کے شہری سے شادی کر لی تھی۔حکام کے مطابق وہ پاکستانی شہری سے اس شادی کو قانونی سمجھتے ہیں جسے امریکا میں قیام کے لئے گرین کارڈ کی ضرورت تھی۔ اخبار کے مطابق اس وقت والٹن ہارلم نامی اپارٹمنٹ میں اپنی والدہ، خاندان کے دوسرے ارکان اور بوائے فرینڈ کے ساتھ رہتی تھی۔ اس کی دو کزن منشیات کے مسائل سے دوچار تھیں اور باقاعدگی سے اپارٹمنٹ میں ٹھہرتی تھیں۔ سٹی جج کے سامنے اپیل میں والٹن نے کہا کہ کئی سال قبل اس کی ایک کزن نے اس کا شناختی کارڈ چرایا اور اسے استعمال کیا۔ گرین کارڈ کے لئے مصنوعی شادی میں اس نے پیسے بھی وصول کیے۔وہ اکثر گھر میں اپنا شناختی کارڈ چھوڑ دیتی تھی۔اس کی کزن کی شکل اس سے ملتی ہے،والٹن نے جج کے سامنے اپنی کزنز کی تصاویر بھی پیش کیں۔جج جان اسپونر نے اس سے اتفاق کیا کہ وہ شناختی چوری کا شکار ہوئیں اس کے بعد والٹن کو نئی شادی کی منظوری دے دی گئی۔