لندن.......متحدہ قومی موومنٹ کے قائد الطاف حسین نے کہاہے کہ ایم کیوایم ایک لبرل ، روشن خیال اورجمہوریت پسند جماعت ہے جس میں جمہوری اصولوںکے تحت ہونے والے انتخابات کے ذریعہ ذمہ داران کا تعین کیاجاتا ہے ۔سینٹرل ایگزیکٹو کونسل دراصل ایم کیوایم کی پارلیمنٹ ہے اور پالیسی میکر باڈی ہے جس کے فرائض میں ایم کیوایم کے آئین کی تشکیل نو، آئین کی شقوںمیںکمی بیشی کرنا ،باہمی مشاورت سے آئین کی شقوںمیں ترمیم کرنا اور ضروری قانون سازی کرنابھی شامل ہے۔ انہوںنے سینٹرل ایگز یکٹو کونسل کے ارکان کو ہدایت کی ہے کہ وہ غیرجانبدار مبصرین کی موجودگی میں خفیہ رائے شماری کے ذریعہ سی ای سی کے آرگنائزر اورمرکزی ذمہ داران کا انتخاب کریں ۔الطا ف حسین نے ان خیالات کااظہار نائن زیروپر سینٹرل ایگزیکٹو کونسل کے پہلے باقاعدہ اجلاس سے ٹیلی فون پر خطاب کرتے ہوئے کیا ۔ اس موقع پر رابطہ کمیٹی کے ارکان بھی موجود تھے ۔ الطاف حسین نے کہاکہ ایم کیوایم کرپٹ سیاسی کلچر اورموروثی سیاست کا خاتمہ چاہتی ہے،اور ہرقسم کی دہشت گردی کے خلاف ہے اور چاہتی ہے کہ ملک سے مذہبی انتہاء پسندی، مذہب اور فرقہ واریت کی بنیاد پردہشت گردی کا خاتمہ ہوملک میں مذہبی رواداری اور فرقہ وارانہ ہم آہنگی فروغ پائے،اورایسے معاشرے کا قیام چاہتی ہے جہاں خواتین کو زندگی کے ہرشعبہ میں برابری کی بنیاد پرمساوی حقوق میسر ہوں،غیرمسلم پاکستانیوں کو زندگی گزارنے اور زندہ رہنے کے یکساں حقوق حاصل ہوں اور غریب ومتوسط طبقہ کے عوام کو بھی ان کے جائز اور بنیادی حقوق میسر آسکیں۔انھوں نے کہا کہ ملک بھر کے تمام صوبوں میں ایم کیوایم کے فکروفلسفہ اورتنظیمی پیغام کافروغ ، زونوں ،سیکٹروں اور یونٹوں میں تنظیمی کارکردگی کاجائزہ لینا، تنظیمی نظم وضبط پر سختی سے عمل درآمد کرانا ، ملک بھرمیں تنظیمی امور کو بہتر بنانا اورملک بھر میں غیرتنظیمی وسماج دشمن سرگرمیوں میں ملوث افراد کی معطلی یا اخراج کی رابطہ کمیٹی سے سفارش کرنابھی سینٹرل ایگزیکٹو کونسل کے فرائض میں شامل ہے ۔الطاف حسین نے کہاکہ تنظیمی فرائض کی ادائیگی کے ساتھ ساتھ سینٹرل ایگزیکٹو کونسل کی یہ بھی ذمہ داری ہے کہ وہ ملک بھر میں عوام کو درپیش مسائل کا جائزہ لے اوران مسائل کے حل اور عوام کو بنیادی سہولیات کی فراہمی کیلئے ضروری پراجیکٹس کے حوالہ سے رابطہ کمیٹی کو اپنی سفارشات پیش کرے۔اور بلدیاتی ، صوبائی ، قومی اسمبلی اور سینیٹ کے انتخابات کے مواقع پر تعلیم یافتہ ،ایماندار اور باصلاحیت افراد کی فہرست مرتب کرنا ، پسند ناپسند کے بجائے خالصتاً میرٹ کی بنیاد پر ناظم ، ٹاؤن ناظم ، یوسی ناظم ، صوبائی وقومی اسمبلی اور سینیٹ کے عہدوں کیلئے موزوں افراد کا چناؤ کرنابھی سی ای سی کے فرائض میں شامل ہے ۔اگر سینٹرل ایگزیکٹو کونسل یہ دیکھے کہ فلاں خاتون یا شخص انگریزی زبان پر عبور رکھتا ہے، بین الاقوامی امور پر اسے مہارت حاصل ہے ، ملکی اور بین الاقوامی سیاست پر اس کی گہری نظر ہے اور وہ غیرملکی سفارتکاروں سے ملاقات میں ایم کیوایم کا مؤقف اچھی طرح بیان کرسکتا ہے، کی سی ای سی میں شمولیت کیلئے رابطہ کمیٹی کو اپنی سفارشات پیش کرسکتی ہے۔الطاف حسین نے سینٹرل ایگزیکٹو کونسل کے قیام پر تمام ذمہ داروں اور کارکنوں کو دلی مبارکبادبھی پیش کی اور انہیں ہدایت کی کہ وہاپنے تمام تر فرائض دوستی اور رشتہ داری سے بالاتر ہوکر صرف اور صرف ایمانداری ،دیانتداری اور خلوص نیت سے انجام دیں۔