کراچی....... مجلس وحدت مسلمین کراچی ڈویژن ضلع جنوبی کے زیر اہتمام فوارہ چوک سے کراچی پریس کلب تک احتجاجی ریلی کا انعقاد کیا گیا اور شمعیں روشن کی گئی ۔سعودی عرب میں انسانی حقوق کے علمبردار عالم دین آیت اللہ شیخ باقر نمر کو کئی ماہ سے قید و سلاسل میں رکھنے کے خلاف احتجاجی مظاہرہ کیا اور اسکی شدید مذمت کی گئی، احتجاجی مظاہرے میں کراچی کے مختلف تعلیمی اداروں سمیت بزنس کمیونٹی سے تعلق رکھنے والے سینکڑوں نوجوانوں نے شرکت کی ، شرکائے مظاہرہ نے ہاتھوں میں بینرز اور پلے کارڈز اٹھا رکھے تھے جن پر آیت اللہ شخ نمر کی آزاد ی سمیت دیگر نعرے درج تھے،اور اقوام متحدہ ، ایمنسٹی انٹر نیشنل ، سمیت عالمی انسانی حقوق کے اداروں سے شیخ نمر کی رہائی کا مطالبہ کیا گیا تھا۔اس موقع پر مجلس وحدت مسلمین کراچی ضلع جنوبی کے رہنما مولانا محمد حسین کریمی ،مولانا احسا ن دانش ،رضوان پنجوانی نے خطاب کرتے ہوئے کہا کہ انسانی حقوق کے لئے جد وجہد کرنے والے شیعہ سنی وحدت کے علمبردار عالم دین آیت اللہ باقر نمر کو قید میں رکھا جانا انسانی حقوق کی پامالی اور مہذب دنیا کے لئے لمحہ فکریہ ہے۔ آیت اللہ باقر کا گناہ صرف اور یہ ہے کہ انہوں نے عرب دنیا میں اٹھنے والی اسلامی بیداری کی لہر پر لبیک کہا اور دنیا کے تمام طاغوتی نظاموں کے خلاف صدائے حق بلند کی ۔