کھلنا.......کھلنا ٹیسٹ کے دوسرے روزکھیل کے اختتام پر پاکستان نے بنگلادیش کے پہلی اننگز کے اسکور 332رنز کے جواب میں ایک وکٹ کے نقصان پر227رنز بنالیے۔محمد حفیظ نے ذمہ دارانہ بیٹنگ کرتے ہوئے سنچری اسکور کی،ٹیسٹ کرکٹ میں یہ ان کی آٹھویں سنچری ہے۔پاکستان کو بنگلادیش کا اسکور برابر کرنے کیلئے مزید105درکار ہیں اور اس کی9وکٹیں باقی ہیں۔پاکستان کی طرف سے محمد حفیظ اور سمیع اسلم نے اننگز کا آغاز کیا، پاکستان کی پہلی وکٹ 50رنز پر گری جب سمیع اسلم 20رنز بناکر آئوٹ ہوگئے۔محمد حفیظ اور اظہر علی نے دوسری وکٹ کی ناقابل شکست شراکت میں177رنز بناکر ٹیم پوزیشن مستحکم کردی۔اس دوران محمد حفیظ نے اپنی آٹھویں ٹیسٹ سنچری مکمل کی۔اس سے پہلے پاکستانی بالرز نے میچ میں کم بیک کرتے ہوئے بنگلا دیشی ٹیم کو 332رنز تک محدود کردیا۔بنگلادیش نے 236 رنز چار کھلاڑی آؤٹ سے اپنی نامکمل اننگز شروع کی ،آج گرنے والی پہلی وکٹ شکیب الحسن کی تھی جو 25 رنز بناکر آؤٹ ہوئے۔انہیں ذوالفقار بابر نے آؤٹ کیا ، جب کہ سومیا سرکار 33 رنز بنا کر محمد حفیظ کی گیند پر کیچ آؤٹ ہوئے۔ کپتان مشفق الرحیم 32رنز بناکر یاسر شاہ کا شکار بنے۔تیج الاسلام ایک رن بناکر یاسر شاہ کی گیند پر کلین بولڈ ہوئے۔کھانے کے وقفے کے فوری بعد محمد شاہد 10اور روبیل حسین 2رنز کی مختصر اننگز کھیل کر آئوٹ ہوگئے، یوں بنگلا دیش کی پوری ٹیم پہلی اننگز میں 332رنز بناسکی۔یاسر شاہ اور وہاب ریاض نے 3،3 جبکہ محمد حفیظ اور ذوالفقار بابر نے 2،2 وکٹیں حاصل کیں۔کھیل ختم ہوا تومحمد حفیظ 137اور اظہر علی 65رنز کے ساتھ ناٹ آئوٹ تھے۔