لندن…متحدہ قومی موومنٹ کے قائد الطاف حسین نے صدرمملکت آصف علی زرداری اورگورنرسندھ ڈاکٹرعشرت العبادسے اپیل کی ہے کہ وہ صومالی قزاقوں کے ہاتھوں یرغمال بنے ہوئے پاکستانی جہازایم وی البیڈوکے عملے کی بازیابی کیلئے کی جانے والی کوششیں تیزکردیں۔اپنے بیان میں الطاف حسین نے کہاکہ کئی ماہ سے صومالی قزاقوں کے ہاتھوں یرغمال بنے ہوئے پاکستانیوں کے اہل خانہ شدیدذہنی کرب واذیت میں مبتلاہیں اوراپنے پیاروں سے ملنے کیلئے بے چین ہیں۔انہوں نے یرغمالیوں کی بازیابی کیلئے صدرمملکت آصف زرداری ،گورنرسندھ ڈاکٹرعشرت العباداورانسانی حقوق کے رہنماانصاربرنی کی کوششوں کو سراہا اوران کوششوں کوتیزکرنے کی ضرورت پرذوردیا۔ الطاف حسین نے کہاکہ جو مخیرحضرات یرغمالیوں کی بازیابی کے سلسلے میں مالی تعاون کرناچاہیں وہ اس سلسلے میں سٹیزن پولیس لائیژن کمیٹی(سی پی ایل سی ) کے چیئرمین احمدچنائے سے رابطہ کرسکتے ہیں۔ انہوں نے یرغمالی پاکستانیوں کے اہل خانہ سے بھی دلی ہمدردی اوریکجہتی کااظہارکیا۔ دریں اثناء الطاف حسین نے جمشیدٹاؤن یوسی 7 کے سابق حق پرست کونسلر اور ایم کیوایم سوسائٹی سیکٹریونٹ 63 کے کارکن انور عالم کی شہادت پر گہر ے رنج کا اظہار کیا ہے ۔ایک تعزیتی بیان میں الطاف حسین نے شہید کے تمام سوگوار لواحقین سے دلی تعزیت و ہمدردی کا اظہار کرتے ہوئے کہاکہ شہید نے تحریک کے مشن و مقصد کے حصول کیلئے نہ صرف اپنی تمامتر خدمات انجام دیں بلکہ سماجی کاموں میں بھی بڑھ چڑھ کر حصہ لیا ،شہید ہر کڑے اور مشکل وقت میں تحریک سے ثابت قدم رہے ، شہید کی تحریک کیلئے خدمات کو ہمیشہ یاد رکھا جائے گا اور ان کی قربانیوں کو بھی رائیگاں نہیں جانے دیا جائے گا ۔انہوں نے کہاکہ انور عالم کی شہادت سے مجھ سمیت ایم کیوایم کا ایک ایک کارکن آپ کے غم میں برابر کا شریک ہے۔ الطاف حسین نے دعا کی کہ اللہ تعالیٰ شہید کو اپنی جوارِ رحمت میں اعلیٰ مقام عطا فرمائے او ر سوگوارا ن کو یہ صدمہ برداشت کرنے کا حوصلہ عطاء کرے ۔(آمین)