لندن......برطانیہ میں باپردہ مسلمان خاتون پر حملے کی ویڈیو منظرِعام پر آگئی، خاتون بے ہوش ہو کر زمین پر جا گریں۔ برطانوی نشریاتی ادارے کی رپورٹ کے مطابق لندن پولیس کے اعدادوشمار کے مطابق مسلمانوں کیخلاف تشدد کے واقعات میں بے پناہ اضافہ دیکھنے میں آرہا ہے۔متعصب افراد کے تشدد کا نشانہ بننے والوں میں زیادہ تر تعداد ان مسلم خواتین کی ہے جو اسلامی شریعت کے مطابق نقاب یا برقع اوڑھتی ہیں۔حال ہی میں جاری کی جانیوالی ویڈیو میں با پردہ خاتون پر ایک شخص حملہ کرتا ہے اور مکہ مار کر خاتون کو زمین پر گِرا دیتا ہے جس کے بعد خاتون زمین پر مکمل بے ہوشی کی حالت میں پڑی ہوئی دِکھائی دے رہی ہیں۔ گزشتہ بارہ ماہ کے دوران صرف لندن میں مسلمانوں کیخلاف 816 وارداتیں رپورٹ ہوئی ہیں۔لندن پولیس کے مطابق صرف شہر میں مسلمانوں کے خلاف پْرتشدد واقعات میں 70 فی صد اضافہ ہوا ہے۔ یہ وہ جرائم ہیں جو کسی کے مسلمان ہونے یا اسے مسلمان سمجھے جانے کی وجہ سے کئے جاتے ہیں۔ ان واقعات میں نقاب یا برقع پہننے والی خواتین کے خلاف زیادہ شدید واقعات پیش آئے۔ جو خواتین اس قسم کے جرائم کا شکار ہوئی ہیں وہ پولیس سے بھی رابطہ کرنے سے گریز کرتی ہیں کیونکہ انہیں یہ ڈر ہوتا ہے کہ اس سے حالات مزید خراب ہو جائینگے۔ واضح رہے کہ برطانیہ میں تقریباً 27 لاکھ مسلمان ہیں جن میں سے 37 فیصد کے قریب لندن میں رہتے ہیں۔