08 نومبر ، 2024 
خیبر پختونخوا کے بعض اضلاع میں امن وا مان کے حوالے سے پولیس کو لیڈ رول دینےکا فیصلہ
08 نومبر ، 2024
وزیر اعلیٰ خیبر پختونخوا علی امین گنڈاپور کی زیر صدارت اپیکس کمیٹی کے اجلاس میں امن وامان کے حوالے سے پولیس کو لیڈ رول دینے اور کرم میں امن کے قیام کے لیے حکومت کی عملداری کے لیے دستیاب تمام آپشن استعمال کر نے کا فیصلہ کرلیا گیا۔
وزیراعلیٰ خیبرپختونخوا علی امین گنڈا پور کی زیر صدارت اپیکس کمیٹی کا اہم اجلاس ہوا جس میں صوبائی وزیر خزانہ، کورکمانڈر پشاور، چیف سیکرٹری اور آئی جی خیبر پختونخوا کے علاوہ اعلیٰ سول اور عسکری حکام نے شرکت کی۔
اجلاس میں صوبے کے بعض اضلاع میں امن وا مان کے حوالے سے پولیس کو لیڈ رول دینے اور کرم میں حکومت کی عملداری کے لیے تمام دستیاب آپشن استعمال کرنے کا فیصلہ کیا گیا۔
صوبے میں امن و امان کی بہتری کے لیے پولیس اور سول انتظامیہ کی استعداد میں اضافہ، پولیس کو بلٹ پروف گاڑیوں کی جلد فراہمی اور خالی اسامیوں پر جلد بھرتی کرنےکا فیصلہ کیا گیا۔
اجلاس میں 6 مہینوں کے دوران شہید ہونے والے سپاہیوں کے لواحقین کے لیے 10 لاکھ جب کہ افسران کے لواحقین کے لیے 20 لاکھ روپے مقرر کیے گئے۔
پاک فوج اور ایف سی کے شہداکے بچوں کو پولیس اور سرکاری محکموں میں بھرتی کرنےکا بھی فیصلہ بھی کیا گیا۔
اجلاس میں کرم کے لوگوں کے جان و مال کی حفاظت اور حکومت کی عملدار ی کے لیے دستیاب تمام آپشن استعمال کرنے کا بھی فیصلہ ہوا۔
