سرینگر........مقبوضہ کشمیر میں کشمیری طلبہ نے ایک بار پھر آزادی اور پاکستان کے حق میں نعرے لگائے۔ بھارتی فورسز نے نہتے کشمیری طلبہ پر شیلنگ اور لاٹھی چارج کیا۔

حریت رہنما سید علی گیلانی نے کہا کہ بھارتی حکومت طاقت کے نشے میں حقائق نظرانداز کررہی ہے۔مقبوضہ کشمیر کا دارالحکومت سرینگر آج پھر پاکستان زندہ باد کے نعروں سے گونج اٹھا۔

آزادی کی شمع دلوں میں جلائے کشمیری نوجوانوں نے پاکستان سے اپنی محبت کا اظہار کیا۔ پاکستان سے محبت اور بھارت سے آزادی کی خواہش ایک بار پھر بھارتی فورسز کے لیے تازیانہ ثابت ہوئی،جس کا جواب نہتے کشمیریوں پر لاٹھی چارج اور شیلنگ سے دیا گیا۔

بزرگ حریت رہنما سید علی گیلانی نے کہا کہ بھارتی حکومت ایسا بدمست ہاتھی بن چکی ہے جسے طاقت کے نشے میں کچھ نظر نہیں آتا۔ بھارتی فورسز کے لاٹھی چارج میں کئی کشمیری طلبہ زخمی ہوئے،جس کا غصہ طلبہ نے پتھرائو کرکے نکالا۔

مقبوضہ کشمیر میں کشمیریوں کے جذبہ حریت نے ایک بار پھر دلی سرکار کو پیغام بھیجا کہ کھوکھلے دعووں اور ہتھکنڈوں کے بجائے سنجیدگی سے مسئلہ کشمیر کو حل کرنے کی جانب قدم بڑھایا جائے۔