ابوظبی.......ابوظہبی ٹیسٹ کے تیسرے روزکھانے کے وقفے پر انگلینڈ نے اپنی پہلی اننگز میں صرف ایک وکٹ کے نقصان پر 122رنز بنالیے۔السٹرکک 78رنز کے ساتھ کریز پر موجود ہیں۔

ابوظہبی کے شیخ زید اسٹیڈیم میں کھیلے جارہے میچ میں انگلش اوپنر نے پاکستان کے 523رنز کے جواب میں پراعتماد آغاز فراہم کیااور پہلی وکٹ کی شراکت میں 116رنز جوڑے۔ اس موقع پر معین علی 35رنز بناکر عمران خان کی گیند پر وکٹ کے پیچھے کیچ ہوگئے، کھانے کے وقفے پر السٹر کک 78اور این بیل ایک رنز پر ناٹ آئوٹ تھے۔

کھیل کے دوسرے روز صحرا میں انگلش بولنگ کے سامنے پاکستانی بیٹسمینوں نے رنز کا پہاڑ کھڑا کردیا، شعیب ملک نے ٹیسٹ کرکٹ میں پاکستان کی جانب سے دسویں بڑی انفرادی اننگز کھیلی، وہ انگلینڈ کے خلاف ظہیر عباس کے274 اورجاوید میاں داد کے260 کے بعد تیسرا بڑی انفرادی اسکور بنانے میں کامیاب ہوئے۔

پاکستان نے دوسرے دن چائے کے وقفے کے بعد اسد شفیق اور شعیب ملک کی شاندار شراکت کی بدولت انگلینڈ کے خلاف پہلے ٹیسٹ میں 523رنز آٹھ کھلاڑی آؤٹ پر اننگز ڈکلیئر کرنے کا اعلان کردیا۔

انگلینڈ کی جانب سے بین اسٹوکس نے 4، جیمز اینڈرسن نے دو جبکہ مارک ووڈ اور اسٹیورٹ براڈ نے ایک ایک وکٹ لی۔