پاکستان کرکٹ بورڈ نے دورہ انگلینڈ کے دوران سینٹرل کنٹریکٹ دینے کا فیصلہ موخر کر دیا ہے ۔ قومی کرکٹرز کے سینٹرل کنٹریکٹ 30 جون کو ختم ہو رہے ہیں ۔

کھلاڑیوں نے انگلینڈ روانگی سے قبل ٹور کنٹریکٹ پر تو دستخط کر دیئے جبکہ پی سی بی کا ارادہ تھا کہ انگلینڈ کے دورے کے دوران کھلاڑیوں کو سینٹرل کنٹریکٹ پیش کر دیئے جائیں گے لیکن اب بورڈ نے ارادہ ترک کر دیا ہے ۔

ذرائع کا کہنا ہے کہ اس وقت پاکستان ٹیم اور پاکستان اے ٹیم میں شامل سبھی کھلاڑی ایکشن میں ہیں ۔ ہیڈ کوچ مکی آرتھر ، چیف سلیکٹر انضمام الحق اور ڈائریکٹر اکیڈمیز مدثر نذر کو ذمہ داریاں سنبھالے زیادہ عرصہ نہیں ہوا ۔

وہ نئے سینٹرل کنٹریکٹ دینے سےپہلے کھلاڑیوں کی کارکردگی کا جائزہ لینا چاہتے ہیں، اس کے علاوہ چند کرکٹرز کا مستقبل غیر یقینی کی صورت حال سے دوچار ہے جن میں مصباح الحق اور شاہد آفریدی شامل ہیں ۔

اگر یہ کھلاڑی دورہ انگلینڈ کے بعد کرکٹ سے منسلک نہیں رہتے تو انہیں سال بھر کا کنٹریکٹ دینے کی کوئی منطق نہیں ہوگی، ان وجوہات کی بنیاد پر اب کرکٹ بورڈ انگلینڈ کی سیریز کے بعد کنٹریکٹ دینے کا ارادہ رکھتا ہے ۔