راجکوٹ میں کھیلے جانے والے پہلے ٹیسٹ میچ کے چوتھے دن انگلینڈ کوبھارت کے خلاف 163رنز کی مجموعی برتری حاصل ہوگئی ہے، جبکہ اس کی تمام وکٹیں ابھی باقی ہیں۔

ہفتے کو جب میچ کے چوتھے روز کھیل کا اختتام ہوا، تو انگلینڈ نے اپنی دوسری اننگز میں بغیر کسی وکٹ کے نقصان پر 114رنز بنا لیے تھے۔ کپتان ایلسٹر کک اور حسیب حمید نے دوسری اننگز میں عمدہ کھیل پیش کرتے ہوئے اپنی ٹیم کو بہتر آغاز فراہم کیا ہے۔

ایلسٹر کک 46 اور حسیب حمید 62 رنز کیساتھ کریز پر موجود ہیں۔ اس سے قبل بھارت نے 319رنز چار کھلاڑی آؤٹ سے اپنی پہلی اننگز کا دوبارہ آغاز کیا، تو پوری ٹیم اسکور میں 169 رنز کا اضافہ ہی کر سکی اور 488رنز پر آؤٹ ہوگئی۔ اس طرح مہمان ٹیم کو اپنی دوسری اننگز میں 49رنز کی برتری حاصل ہوئی۔

بھارت کی جانب سے چیتیشور پجارا 124اور مرلی وجے 126رنز کے ساتھ نمایاں رہے۔ ان کے علاوہ ایشیون نے 70 رنز کی اننگز کھیلی۔ انگلینڈ کی جانب سے پہلی اننگز میں لیگ سپنر عادل رشید چار وکٹیں حاصل کر کے نمایاں بولر رہے۔ ان کے علاوہ ظفر انصاری اور معین علی نے دو، دو کھلاڑیوں کو آؤٹ کیا۔

بھارتی کپتان وراٹ کوہلی بڑی اننگز کھیلنے میں ناکام رہے اور 40رنز بنا کر عادل رشید کی گیند پر ہٹ وکٹ آؤٹ ہوگئے۔ امت مشرا صفر، ریحانے 13 اور رویندرا جدیجہ 12 رنز ہی بنا سکے۔