وزیر اعظم نواز شریف ایک اعلیٰ سطح وفد کے ہمراہ آ ج ترکمانستان کے دورے پر روانہ ہو رہے ہیں۔ انہیں اس دورے کی دعوت ترکمانستان کے صدر قربان علی بردی نے دی تھی۔

اپنے دورے میں وزیر اعظم نواز شریف ترکمانستان کے صدر سے ملاقات کے علاوہ دارالحکومت اشک آباد میں پائیدار ٹرانسپورٹ کے بارے میں منعقدہ پہلی عالمی کانفرنس میں اپنے وفد کی قیادت بھی کریں گے۔

اقوام متحدہ کے سیکرٹری جنرل بان کی مون اور ترکمانستان مشترکہ طور پر اس کانفرنس کی میزبانی کر رہے ہیں، جس میں حکومتی سربراہوں، وزرا، نجی شعبوں کے چیف، سول سوسائٹی کے رہنماء اقوام متحدہ کے حکام سمیت پندرہ مندوبین شرکت کر رہے ہیں۔

کانفرنس میں پائیدار ترقی کے ایجنڈا 2030ء کے تحت پائیدار ٹرانسپورٹ کے حوالے سے مختلف امور پر تبادلہ خیال کیا جائے گا۔ پاکستان ٹرانسپورٹ اور مواصلاتی رابطوں کے ذریعے وسط ایشیا کی ریاستوں کے ساتھ رابطوں کے فروغ کا خواہاں ہے۔

اس سے ان علاقوں کے ساتھ تجارت، معیشت، سیاحت اور عوامی رابطوں کے شعبوں میں تعلقا ت کو فروغ دیا جا سکتا ہے، جبکہ پاکستان اور چین اقتصادی راہداری کا منصوبہ شروع کر چکے ہیں۔ جس کا مقصد کراچی اور گوادر کی بندرگاہوں کا دوسری دنیا کے ساتھ رابطہ جوڑنا ہے۔

پاکستان کی ریلوے اور سڑکوں کو وسطی ایشیا کے ساتھ جوڑ کر ان ممالک کا رابطہ کراچی اور گوادر کے ساتھ قائم کیا جا سکتا ہے۔ اپنے دورے کے دوران وزیراعظم محمد نواز شریف ترکمانستان کے صدر گور بنگولی بردی محمدوف سے ملاقات کریں گے۔