پارٹی سے کسی رکن نے انحراف کیا تو اجتماعی استعفیٰ دے دیں گے، فاروق ستار

متحدہ قومی موومنٹ پاکستان کے سربراہ فاروق ستار کا کہنا ہے کہ اگر کسی سینیٹر، ایم این اے یا ایم پی اے نے پارٹی پالیسی سے انحراف کیا یا کسی اور جماعت میں شمولیت اختیار کی تو اجتماعی استعفیٰ دے دیں گے۔ 

کراچی میں ایم کیو ایم پاکستان کے بہادرآباد میں قائم عارضی مرکز میں پارٹی اجلاس کے بعد پریس کانفرنس کرتے ہوئے فاروق ستار کا کہنا تھا کہ پارٹی کے بانی سے لاتعلقی کے ڈیڑھ سال بعد بھی ثابت قدمی سے پاکستان کے ساتھ کھڑے ہیں لیکن آج بھی معاملہ جوں کا توں ہے اور اراکین پی ایس پی میں جارہے ہیں۔

ایم کیو ایم پاکستان کے سربراہ کا کہنا تھا کہ ارکان سندھ اسمبلی کو وفاداریاں تبدیل کرنے پر مجبور کیا جا رہا ہے اور اس کی وجہ ناقابل فہم ہے، ہمیں یقین ہے کہ یہ اداروں کی پالیسی ہے اور نہ ہی افواج پاکستان کی۔

انہوں نے کہا کہ کوئی دباؤ میں پارٹی چھوڑ کر جاتا ہے تو ہماری دل شکنی ہوتی ہے، ہمارا پارٹی کے کسی رکن پر کوئی دباؤ نہیں اس لئے اگر کوئی بتا کر جاتا ہے تو کوئی مسئلہ نہیں ہے۔

سلمان مجاہد ایم کیوایم سے خارج، پارٹی میں گروپ بندی کا الزام لگا دیا

ایم کیوایم کسی کے باپ کی جاگیر نہیں مجھے کوئی نہیں نکال سکتا، پارٹی میں دھڑے بندی ہے، سلمان مجاہد بلوچ

فاروق ستار کا کہنا تھا کہ ہم نےآج آخری مرتبہ اپنے ارکان اسمبلی اور سینیٹرز سے واضح پوچھا کہ وہ مطمئن نہیں تو بتائیں، ہم وزیراعظم اور آرمی چیف تک تحفظات نہ پہنچائیں تو جو چور کی سزا وہ ہماری ہے۔

ایم کیو ایم پاکستان کے رہنما نے کہا کہ آج اجلاس کے دوران تمام سینیٹرز اور صوبائی اسمبلی اراکین سے استعفے جمع کرلئے ہیں جو ہمارے پاس موجود ہیں، اگر کوئی بھی رکن کسی جماعت میں گیا تو اجتماعی استعفیٰ دے دیں گے۔

فاروق ستار نے کہا کہ ہمارے مینڈیٹ کی مسلسل توہین کی جارہی ہے، قومی اور سندھ اسمبلی کے اسپیکر اس معاملے کو دیکھیں، مستعفی اراکین کے استعفے فوری طور پر منظور کیے جائیں، ہم اپنے حلقوں میں عوام کے پاس جانے کو تیار ہیں۔

فاروق ستار نے کہا کہ پی ایس پی سینیٹ میں ہماری نمائندگی ختم کرنےکا آلہ کار بن رہی ہے، آئندہ برس مارچ میں ہونے والے کے سینیٹ انتخاب میں پی ایس پی کی وجہ سے مہاجروں کو نقصان ہوگا۔

خیال رہے کہ جیو نیوز کے پروگرام 'جرگہ' میں میزبان سلیم صافی کو انٹرویو کے دوران سلمان مجاہد بلوچ نے ایم کیو ایم پاکستان میں دھڑے بندیوں کا الزام عائد کیا اور کہا کہ کنور نوید جمیل اور کشور زہرا براہ راست جب کہ فاروق ستار بالواسطہ الطاف حسین سے رابطے میں ہیں۔

سلمان بلوچ نے یہ بھی الزام لگایا کہ بانی ایم کیو ایم کی سالگرہ کے موقع پر کراچی میں پارٹی رہنما کے گھر تقریب بھی منعقد کی گئی اور بذریعہ واٹس ایپ کال بانی کو سالگرہ پر مبارکباد بھی دی۔

ایم کیو ایم پاکستان میں دھڑے بندی کسی کی خواہش ہو سکتی ہے حقیقت نہیں: فاروق ستار

ایم کیو ایم پاکستان کے معطل رکن سلمان مجاہد نے گزشتہ روز پارٹی میں دھڑے بندی کا الزام عائد کیا تھا۔

ایم کیو ایم پاکستان کے سربراہ فاروق ستار سلمان مجاہد بلوچ کے الزامات کی سختی سے تردید کرچکے ہیں، جن کا کہنا ہے کہ پارٹی میں دھڑے بندی کسی کی خواہش ہو سکتی ہے لیکن اس میں کوئی حقیقت نہیں ہے۔