بھارتی ٹیم کے نہ آنے سے پاکستان کرکٹ کی ترقی نہیں رکے گی، ظہیر عباس
29 نومبر ، 2017
پاکستان کرکٹ ٹیم کے سابق کپتان ظہیرعباس کا کہنا ہے کہ بھارتی کرکٹ ٹیم کے پاکستان نہ آنے سے ملک میں کرکٹ کا فروغ نہیں رُکے گا۔
آئی سی سی کے سابق صدر اور پنجاب اسپورٹس اکیڈمیز کے چیف ایگزیکٹو ظہیر عباس نے کرکٹ اکیڈمی کے قیام کے لیے گجرانوالہ کا دورہ کیا۔
اس موقع پرمیڈیا سے گفتگو میں اُن کا کہنا تھا کہ پنجاب میں نوجوانوں کو کرکٹ سکھانے کے لیے لاہور اور راولپنڈی سمیت مختلف شہروں میں 9 اکیڈمیاں بنائی گئی ہیں اور اب گجرانوالہ اور اٹک میں بھی اکیڈمیاں قائم کی جارہی ہیں۔
ایشین بریڈ مین کا کہنا تھا کہ پاکستان اور بھارت کے عوام دونوں ملکوں کے درمیان کرکٹ دیکھنا چاہتے ہیں لیکن بھارت کے پاکستان آ کر نہ کھیلنے سے پاکستان کرکٹ کی ترقی نہیں رکے گی۔
فکسنگ اسکینڈلز کے حوالے سے ظہیرعباس کا کہنا تھا کہ کرپشن کرنے والوں کی کرکٹ اب ختم ہو چکی ہے۔
