مقبوضہ کشمیر میں مکمل ہڑتال، مزید ایک کشمیری دم توڑ گیا

سری نگر: مقبوضہ کشمیر میں بھارتی جارحیت کے خلاف آج دوسرے روز بھی مکمل ہڑتال کی جارہی ہے جب کہ جنوبی حصوں میں کرفیو نافذ کردیا گیا ہے۔

مقبوضہ کشمیر میں بھارتی فوج کی فائرنگ میں زخمی مزید ایک کشمیری دم توڑ گیا جس کے بعد شہداء کی تعداد 18 ہوگئی۔ 

مقبوضہ وادی میں بھارتی سیکیورٹی فورسز کے ہاتھوں نوجوانوں کی شہادت پر کشمیری سراپا احتجاج ہیں اور وادی بھر میں مکمل ہڑتال کی جارہی ہے۔

حریت رہنماؤں کے اعلان پر شہیدوں سے اظہار یک جہتی کے لئے آج شوپیاں تک بھارت مخالف احتجاجی مارچ بھی کیا جائے گا جب کہ احتجاج سے خوفزدہ قابض انتظامیہ نے سری نگر اور جنوبی علاقوں میں کرفیو نافذ کر رکھا ہے۔ 

وادی میں اسکول، کالجز اور دیگر تعلیمی ادارے مکمل بند ہیں جب کہ سری نگر سمیت جنوبی حصوں میں کرفیو نافذ ہے۔

بھارتی فورسز کی ریاستی دہشت گردی؛ مقبوضہ کشمیر میں شہداء کی تعداد 17 ہوگئی

قابض فورسز نے ضلع شوپیاں اور اسلام آباد میں کارروائیاں کیں، علاقے میں انٹرنیٹ اور ٹرین سروس بھی معطل

مشترکہ مزاحمتی قیادت سید علی گیلانی، میر واعظ عمر فاروق گھروں میں بدستور نظر بند ہیں جب کہ یاسین ملک کو تین روزہ ریمانڈ پر سری نگر کی سینٹرل جیل بھیج دیا گیا ہے ۔

یاد رہے کہ یکم اپریل کو بھارتی سیکیورٹی فورسز نے شوپیاں اور اسلام آباد کے اضلاع میں سرچ آپریشن کے نام پر بربریت کا مظاہرہ کیا جس کے نتیجے میں 17 نوجوان شہید اور 100 سے زائد زخمی ہوگئے تھے۔