امریکا اور روس کا تنازع، خام تیل کی قیمتیں تین سال کی بلند ترین سطح پر پہنچ گئیں

شام کے معاملے پر روس اور امریکا کے درمیان لفظی جنگ میں شدت آنے کے بعد عالمی مارکیٹ میں خام تیل کی قیمتیں تین سال کی بلند ترین سطح پر پہنچ گئیں۔

امریکی صدر ڈونلڈ ٹرمپ نے اپنی ٹوئٹ میں لکھا ہے کہ روس شام میں امریکی میزائل حملوں کے لیے تیار ہوجائے۔ امریکی صدر نے یہ بیان لبنان میں تعینات روسی سفیر کے اس انٹرویو کے بعد جاری کیا جس میں انہوں نے کہا تھا کہ روس شام کی جانب آنے والے تمام میزائلز کو تباہ کردے گا۔

روس، شام میں امریکی میزائل حملوں کے لیے تیار ہوجائے، ڈونلڈ ٹرمپ

روس کو گیس حملہ کرنے والے شخص کا ساتھ نہیں دینا چاہیے تھا جو اپنے لوگوں کو قتل کرتا ہے اور خوش ہوتا ہے، امریکی صدر

امریکا اور روس کے درمیان اس کشیدگی کا اثر دنیا بھر کی اسٹاک مارکیٹس اور تیل کی قیمتوں میں بھی دیکھنے میں آیا۔

عالمی منڈی میں خام تیل کی قیمت دسمبر 2014 کے بعد کی بلند ترین سطح پر پہنچ گئی ہے۔

برینٹ کروڈ آئل کی قیمت 1.10 ڈالر فی بیرل اضافے کے بعد 72.14 ڈالر فی بیرل پر پہنچ گئی جبکہ یو ایس ویسٹ ٹیکساس کروڈ آئل کی قیمت 1.31 ڈالر اضافے کے بعد 66.82 ڈالر فی بیرل پر پہنچ گئی۔