سرفراز کا ٹاس جیت کر بیٹنگ کا فیصلہ درست تھا، وسیم اکرم

لیڈز: پاکستان کرکٹ ٹیم کے سابق کپتان اور ماضی کے عظیم فاسٹ بولر وسیم اکرم نے کپتان سرفراز احمد کا ٹاس جیت کر پہلے بیٹنگ کرنے کا فیصلہ درست قرار دے دیا۔

جمعے کو ہیڈنگلے میں جیو سے بات چیت کرتے ہوئے وسیم اکرم نے کہا کہ جس طرح کی کنڈیشن تھیں اور دھوپ نکلی ہوئی تھی اگر میں بھی ٹاس جیت لیتا تو پہلے بیٹنگ ہی کرتا۔

’ہمیں انگلینڈ کے بولروں کو کریڈٹ دینا ہوگا جنہوں نے کنڈیشنز کو بہت اچھے طریقے سے استعمال کیا لیکن جب میچ شروع ہوا تو گیند مسلسل ہل رہا تھا۔‘

لیڈز ٹیسٹ کا پہلا دن انگلینڈ کے نام

پاکستان کو 174 رنز پر آؤٹ کرنے کے بعد دن کے اختتام پر انگلینڈ نے دو وکٹوں کے نقصان پر 106 رنز بنالیے

وسیم اکرم نے کہا کہ پاکستان کی پہلی اننگز میں کوئی گیند ایسی نہیں تھی جو سوئنگ نہ ہوئی ہو، ہلتی ہوئی گیندوں پر کسی بھی لمحے پاکستانی بیٹنگ کو سنبھلنے کا موقع نہیں مل سکا، لاردز ٹیسٹ میں کچھ گیندیں ایسی تھیں جو سیدھی رہ رہی تھی لیکن ہیڈنگلے کی کنڈیشنز مشکل تھیں جس پر بیٹسمینوں کو الزام دینا درست نہیں ہے۔

وسیم اکرم نے شاداب خان کی بیٹنگ صلاحیتوں کو کریڈٹ دیتے ہوئے کہا کہ شاداب کو میں نے اسلام آباد یونائیٹیڈ میں منتخب کیا تھا، ہر اننگز کے بعد شاداب ایک منجھے ہوئے کھلاڑی کے طور پر سامنے آرہے ہیں۔

سرفراز کا ٹاس جیت کر بیٹنگ کرنا درست فیصلہ تھا، رمیز راجہ

سرفراز کا پہلے بیٹنگ کرنا ایک دلیرانہ فیصلہ تھا جسے سراہنا چاہیے، عین ممکن تھا کہ انگلش کپتان بھی ٹاس جیت کر پہلے بیٹنگ ہی کرتے، رمیز راجہ

خیال رہے کہ کپتان سرفراز احمد نے انگلینڈ کے خلاف دوسرے ٹیسٹ میچ میں ٹاس جیت کر بیٹنگ کا فیصلہ کیا تاہم پاکستانی ٹیم محض 174 ہی بناسکی۔

سرفراز کے بارے میں کچھ ماہرین کا کہنا ہے کہ وہ وکٹ کو سمجھ نہ سکے، ابر آلود موسم میں گرمی تھی، بظاہر پچ سے گھاس غائب تھی لیکن پاکستان کی پہلی اننگز میں پچ پر گیند گھومتی رہی۔