15 دسمبر ، 2018 
اپوزیشن کا سعد رفیق کے پروڈکشن آرڈر تک دونوں ایوانوں کے بائیکاٹ پر اتفاق
15 دسمبر ، 2018
اسلام آباد: اپوزیشن میں خواجہ سعد رفیق کے پروڈکشن آرڈر جاری ہونے تک قومی اسمبلی اور سینیٹ اجلاس کے بائیکاٹ پر اتفاق ہوگیا۔
ذرائع کے مطابق مسلم لیگ (ن) نے خواجہ سعد رفیق کے پروڈکشن آرڈر جاری ہونے تک سینیٹ اور قومی اسمبلی کے اجلاسوں کے بائیکاٹ کے لیے دیگر اپوزیشن جماعتوں سے مشاورت مکمل کرلی ہے جس کےبعد اپوزیشن کے درمیان سینیٹ اور قومی اسمبلی کے اجلاسوں کے بائیکاٹ پر اتفاق کرلیا گیا ہے۔
ذرائع نے بتایا کہ پیپلزپارٹی اور متحدہ مجلس عمل نے بھی بائیکاٹ کے معاملے پر مسلم لیگ (ن) کو ساتھ دینے کی یقین دہانی کرادی ہے تاہم اس حوالے سے حتمی منظوری پیر کو اپوزیشن جماعتوں کے مشترکہ اجلاس میں لی جائے گی جس کی صدارت مسلم لیگ (ن) کے چیئرمین اور سینیٹ میں قائد حزب اختلاف راجہ ظفر الحق کریں گے۔
یاد رہےکہ اسپیکر قومی اسمبلی کی جانب سے خواجہ سعد رفیق کے پروڈکشن آرڈر جاری کرنے کے معاملے قانونی ماہرین سے مشاورت کا کہا گیا ہے۔
واضح رہےکہ نیب نے خواجہ سعد رفیق کو پیراگون ہاؤسنگ سوسائٹی کیس میں گرفتار کیا ہے اور مسلم لیگ (ن) کی جانب سے قومی اسمبلی اجلاس میں شرکت کے لیے خواجہ سعد کے پروڈکشن آرڈر جاری کرنے کا مطالبہ کیا گیا ہے جب کہ (ن) لیگ نے قومی اسمبلی کے رواں سیشن کا بائیکاٹ بھی کیا ہے۔
