08 اپریل ، 2019 
پاکستان نے جذبہ خیر سگالی کے تحت 100 بھارتی ماہی گیروں کو رہا کر دیا
08 اپریل ، 2019
پاکستانی حکومت کی جانب سے جذبہ خیر سگالی کے تحت رہا کیے گئے 100 بھارتی ماہی گیروں کو واہگہ بارڈر پر بھارتی حکام کے حوالے کر دیا گیا۔
سمندری حدود کی خلاف ورزی پر گرفتار بھارتی ماہی گیروں کو کراچی کی لانڈھی جیل سے بذریعہ ٹرین لاہور پہنچایا گیا۔
کراچی کی لانڈھی جیل سے اتوار کے روز 100 بھارتی ماہی گیروں کو رہا کیا گیا تھا۔یہ ماہی گیر علامہ اقبال ایکسپریس کے ذریعے لاہور ریلوے اسٹیشن پہنچے۔
بھارتی ماہی گیروں کا کہنا تھا کہ کھلے سمندر میں پتہ ہی نہیں چلتا کہ کب بھارتی حدود ختم ہوئی اور کب وہ پاکستانی حدود میں داخل ہو گئے۔ رہا ہونے والے بعض ماہی گیروں نے کہا کہ اب وہ واپس بھارت جا کر مچھلیاں پکڑنے کا کام ہی چھوڑ دیں گے۔
وزارت داخلہ کے مطابق رواں ماہ کے دوران مزید 260 بھارتی ماہی گیر وں کو رہا کیا جائے گا۔
