وزن کم کرنے کا نسخہ

جن افراد کا وزن بڑھ جاتا ہے وہ خاصے پریشان دکھائی دیتے ہیں کیوں کہ وزن کم کرنا اور منے کا نام رکھانا آسان کام نہیں۔ یار لوگوں نے وزن کم کرنے کے بہانے اسے کمائی کا دھندہ بنا لیا ہے۔ وہ بھانت بھانت کے نسخے پیش کرتے ہیں نسخہ کارگر ہو یا نہ ہو مگر بندے کے پاس رقم کا ہونا ضروری ہے۔

لیکن اب خوش خبری ہے ان تمام افراد کو جو رقم خرچ کیے بغیر اپنا وزن کم کرنا چاہتے ہیں۔ جی ہاں، حاضر خدمت ہے اب ایک ایسا جدید سائنسی نسخہ جس پر آپ کا ایک دھیلا (یہ دھیلا وہ نہیں جس کا ذکر شہباز شریف کرتے ہیں) بھی خرچ نہیں ہو گا۔ تو نسخہ نوٹ فرما لیں؛

سائنس دانوں نے جدید تحقیق کے بعد انکشاف کیا ہے کہ محبوب کی جدائی میں رونے سے وزن کم ہوتا ہے اور دل کو سکون ملتا ہے۔ ماہرین نے بتایا کہ رونے کے لیے بہترین وقت شام سات بجے سے رات دس بجے تک ہے۔ تو روئیں اور دل کی بھڑاس نکالیں۔ وزن خود بخود کم ہو جائے گا یعنی نہ ہلدی لگے نہ پھٹکری رنگ بھی چوکھا ہی چوکھا۔

اس تمہید کے بعد عرض ہے کہ وہ موٹی لڑکیاں جن کی شادی موٹاپے کی وجہ سے رکی ہوئی ہے انہیں ہمارے دوست حکیم شرارتی نے مشورہ دیا ہے کہ وہ ایک ناکام محبت کر لیں اور محبوب سے جدا ہو کر رو رو کے اپنا برا حال کر لیں تا کہ ان کا وزن تیزی سے کم ہو اور وہ دل کش دکھائی دینے لگیں۔  دیکھیے فی زمانہ ہر شخص مصروف دکھائی دیتا ہے، تصور جاناں کرکے بیٹھنے کے لیے دگنی فرصت چاہیے جو مرزا غالب کو بھی میسر نہیں تھی وہ خود فرماتے ہیں کہ

جی ڈھونڈتا ہے پھر وہی فرصت کہ رات دن

بیٹھے رہیں تصور جاناں کیے ہوئے 

جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔