پاکستان

سندھ ہائیکورٹ کا نیب کو آغا سراج کیخلاف 11 جون تک ریفرنس دائر کرنے کا حکم

29 مئی ، 2019

کراچی: سندھ ہائیکورٹ نے نیب کو اسپیکر سندھ اسمبلی آغا سراج درانی کے خلاف 11 جون تک ریفرنس احتساب عدالت میں دائر کرنے کا حکم دے دیا۔

سندھ ہائیکورٹ میں اسپیکر آغا سراج درانی، ان کے بھائی مسیح الدین اور دیگر ملزمان کی درخواست ضمانت پر سماعت ہوئی۔

نیب کے تفتیشی افسر نے عدالت کو بتایا کہ چیئرمین نیب نے آغا سراج درانی اور دیگر ملزمان کے خلاف ریفرنس دائر کرنے کی منظوری دے دی ہے، ملزمان کے خلاف کل احتساب عدالت میں ریفرنس دائر کردیا جائے گا۔

نیب افسر نے عدالت کو بتایا کہ آغا سراج درانی اور دیگر کے خلاف تحقیقات مکمل ہوچکی ہیں، ملزم کی 35 گاڑیوں اور کروڑوں روپے جائیدادوں کا سراغ لگا لیا، ملزم نے اختیارات کا ناجائز استعمال کیا، غیرقانونی بھرتیاں اورکرپشن کی، آمدن سے زائد اثاثے بنائے جس کے اہم شواہد حاصل کرلیے ہیں۔

دورانِ سماعت آغا سراج درانی کے وکیل نے مؤقف اپنایاکہ میرے مؤکل جیل میں ہیں ان کی درخواست ضمانت سنی جائے، اس پر چیف جسٹس سندھ ہائیکورٹ نے کہاکہ ابھی تک مواد سامنے ہی نہیں آیا تو سماعت کیسے کریں، کیا سنیں گے اور فیصلہ کس بنیاد پر دیں؟ ریفرنس دائر ہو جائے تو درخواست ضمانت بھی سن لیں گے۔

سندھ ہائیکورٹ نے نیب کو 11 جون تک ریفرنس دائر کرکے رپورٹ پیش کرنے کا حکم دے دیا۔

واضح رہےکہ نیب نے پیپلزپارٹی کے رہنما آغا سراج درانی کو 20 فروری کو اسلام آباد سے گرفتار کیا، نیب حکام نے کراچی میں ان کی رہائش گاہ پر چھاپے بھی مارے جہاں حکام کچھ دستاویزات ساتھ لے گئے۔