18 اکتوبر ، 2019 
سرفراز کو کیوں ہٹایا؟ گلیڈی ایٹرز کے مالک ندیم عمر کی پی سی بی پر تنقید
18 اکتوبر ، 2019
پاکستان کرکٹ بورڈ (پی سی بی) کے بورڈ آف گورنرز کے سابق رکن اور پاکستان سپر لیگ (پی ایس ایل) ٹیم کوئٹہ گلیڈی ایٹرز کے مالک ندیم عمر نے سرفراز احمد کو کپتانی سے ہٹائے جانے پر مایوسی کا اظہار کرتے ہوئے پی سی بی سے فیصلے پر دبارہ غور کا مطالبہ کردیا۔
پاکستان کرکٹ بورڈ کی جانب سے سرفراز احمد کو ون ڈے اور ٹیسٹ ٹیم کی قیادت سے ہٹائے جانے کے باضابطہ اعلان کے بعد ایک بیان میں ندیم عمر نے کہا کہ انہیں پاکستان کرکٹ بورڈ کے فیصلے پر بہت تعجب ہوا کیوں کہ سرفراز احمد کی قیادت میں پاکستان ٹی ٹوئنٹی کی نمبر ون ٹیم بنا۔
انہوں نے کہا کہ مسلسل 11 سیریزیں جیتیں، صرف ایک سیریز کی بنیاد پر سرفراز احمد کو اس فارمیٹ سے ہٹادینا نا انصافی ہے۔
ندیم عمر نے پی سی بی کے فیصلے کو غیر منصفانہ قرار دیتے ہوئے کہا ہے کہ پی سی بی فیصلے پر دوبارہ غور کرے۔
ندیم عمر نے مزید کہا کہ ون ڈے میں بھی جب سرفراز نے قیادت سنبھالی تو پاکستانی ٹیم کی براہ راست ورلڈ کپ تک رسائی بھی مشکل تھی، سرفراز نے ایسے میں ٹیم کو سنبھالا، چیمپئنز ٹرافی جتوائی اور رینکنگ بہتر بنوائی۔
ندیم عمر، جو سابقہ کراچی کرکٹ ایسوسی ایشن کے صدر بھی رہ چکے ہیں، نے خدشہ ظاہر کیا کہ سرفراز کو یوں قیادت سے ہٹائے جانے سے پاکستان کرکٹ کو نقصان ہوگا۔
